Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 688 Hüküm no: 738 Orijinal metin no: [113b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma bt. Abdullah’ın muhalaa yoluyla kocası Hüseyin b. Hasan’dan boşandığı Mahmiye-i Edirne mahallâtından Derviş Ali mahallesinde sâkine Fâtıma bt. Abdullah nâm hâtun tarafından hul‘-ı âti’z-zikri ikrâra vekîl olup Mustafa b. Mahmud ve İsmail b. el-Hâc Ali nâm kimesneler şehâdetleri ile şer‘an vekâleti sâbite olan el-Hâc İbrahim b. Mahmud nâm kimesne meclis-i şer‘-i hatîr-i lâzimü’t-tevkīrde müvekkile-i mezbûrenin zevci bâ‘isü’l-kitâb Hüseyin b. Hasan mahzarında ikrâr ve takrîr-i kelâm edip müvekkilem mezbûre Fâtıma’nın merkūm Hüseyin zimmetinde mütekarrir olan altı yüz akçe mehr-i müecceli ve nafaka-i iddet-i ma‘lûmesi ve kadri ma‘rûf meûnet-i süknâsından fâriğa olmak üzere muhâla‘a-i sahîha-i şer‘iyye ile muhâla‘a edip merkūm Hüseyin dahi minvâl-i muharrer üzere hul‘-ı mezbûru kabûl ettikden sonra herbiri zevciyyete müte‘allika da‘vâdan âharın zimmetini ibrâ-i âmm-ı kātı‘u’n-nizâ‘la ibrâ ve ıskāt eylediler dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Tahrîren fi’l-yevmi’s-sâdis min-Şevvâli’l-mükerrem li-sene semân ve sittîn ve elf. Şühûdü’l-hâl: Fahrü’l-kuzât Veliyyüddin Efendi b. Yusuf, Eyüb b. Abdullah, Hüseyin b. Mehmed, Mustafa b. Hamza Bey ve gayruhüm.