Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 698 Hüküm no: 754 Orijinal metin no: [115b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pasko v. Yani’nin fuzuli olarak bazı mallarını aldığı iddiasıyla Mehmed Bey b. İbrahim aleyhine açtığı davada haksız olduğu Mahmiye-i Edirne tevâbi‘inden Çöke nâhiyesine tâbi‘ Karaca nâm karyede sâkin Pasko v. Yani meclis-i şer‘de Mehmed Bey b. İbrahim muvâcehesinde da‘vâ ve takrîr-i kelâm edip târih-i kitâbdan üç sene mukaddem mezbûr Mehmed Bey fuzûlen benim on üç keyl simsim ve beş müd çavdar ve on müd buğday ve otuz beş çit saman ve beş yüz kiremid [ve] bin akçemi ahz u kabz etmişidi taleb eylerim dedikde mezbûr Mehmed Bey cevâbında meblağ-ı mezbûr bin akçe ve zikri mürûr eden esbâbı da‘vâdan mezkûr Pasko zimmetimi ibrâ ve ıskāt edip ve ibrâ ve ıskāt eylediğini huzûr-ı Müslimînde ikrâr dahi etmişidi dedikde gıbbe’l-istintâk mezbûr Pasko inkâr ile cevâb vericek mezbûr Mehmed Bey’den müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden olup karye-i mezbûrede sâkin Ömer b. Mehmed ve Ahmed b. Abdullah nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ mezbûr Pasko huzûrumuzda merkūm Mehmed fuzûlen ahz eylediği on üç keyl simsim ve beş müd çavdar ve on müd buğday ve otuz beş çit saman ve beş yüz kiremid ve bin akçe da‘vâsından zimmetini ibrâ-i âm ile ibrâ ve ıskāt eyledim ikrârına bizi işhâd eyledi biz bu husûsa bu vech üzere şâhidleriz şehâdet dahi ederiz deyu herbiri şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın mezbûr Pasko ta‘arruzdan men‘ birle mâ-vaka‘a [bi’t-taleb] ketb olundu. Fî Şevvâli’l-mükerrem li-sene semân ve sittîn ve elf. Şühûdü’l-hâl: Mehmed b. Mustafa, İsa [b.] Ahmed, Ca‘fer [b.] Abdullah, Arslan [b.] Mehmed.