Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 699 Hüküm no: 755 Orijinal metin no: [115b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa b. Abdullah’ın Ali Çelebi’de olan alacağını varisi ve kız kardeşi Sâliha bt. Mustafa vasıtasıyla terekesinden tahsil ettiği Mahmiye-i İstanbul’da Çukurbostan kurbünde sâkin olup hâlâ mahrûse-i Edirne’de iken Ciğerkapısı kurbünde sâkin olan Mehmed Ağa b. Abdullah nâm kimesne mahrûse-i mezbûrede meclis-i şer‘-i hatîr-i lâzimü’t-tevkīrde işbu sâhibetü’l-kitâb Sâliha bt. Mustafa nâm hâtun mahzarında ikrâr-ı tâm ve takrîr-i kelâm edip medîne-i Filibe’de ticâret tarîkı ile müsâfir iken fevt olan Ali Çelebi b. Musa zimmetinde cihet-i deyn-i şer‘îden yüz elli bin akçem olup meblağ-ı mezbûr zimmetinde kalmışidi hâlâ mezbûre Sâliha müteveffâ-yı merkūm Ali Çelebi’nin li-üm kız karındaşı ve vârisesi olmağla cümle muhallefâtına vâzı‘atü’l-yed olmağın meblağ-ı mezbûr yüz elli bin akçe hakkımın yüz yirmi bin fıddî râyic fi’l-vakt akçesini mezkûre Sâliha yedinden alıp kabz edip mâ‘adâsı olan otuz bin akçe da‘vâsından mezbûre Sâliha’nın zimmetini ibrâ-i âm ile ibrâ ve ıskāt eyledim dedikde mukırr-ı mezbûrun vech-i muharrer üzere cârî ve sâdır olan ikrârını mezkûre Sâliha vicâhen ve şifâhen tasdîk ve tahkīk edicek mâ-vaka‘a bi’t-taleb ketb olundu. Fi’l-yevmi’s-sâmin aşer min-Şevvâli’l-mükerrem li-sene semân ve sittîn ve elf. Şühûdü’l-hâl: Sefer [b.] Ca‘fer, Yunus [b.] Mehmed, Mustafa Efendi b. İsmail, Mahmud b. Ali, Yusuf Efendi, Mustafa [b.] Mehmed, Ramazan [b.] Mehmed ve gayruhüm.