Bab Mahkemesi 54 Numaralı Sicil (H. 1102 / M. 1691) cilt: 20, sayfa: 303 Hüküm no: 363 Orijinal metin no: [61b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsayi v. Ovanes’in terekesinden Cevher bt. Altun’a vakıf evin devri Mahmiye-i İstanbul’da Kızıltaş mahallesinde sâkin iken bundan akdem hâlik olan İsayi v. Ovanes nâm zımmînin verâseti, sulbî oğlu Ağya’ya ve sulbiye kebîre kızları Karine ve Maryem nâm nasrâniyyelere münhasıra olduğu mütehakkik oldukdan sonra merkūm Ağya kendi tarafından asâleten ve merkūmetân Karine ve Maryem taraflarından husûs-ı âti’l-beyâna vekîl olduğu zâtlarını ârifân Kirkor v. Kalos ve Serkis v. Agob nâm zımmîler şehâdetleriyle sâbit olmağla vekâleten meclis-i şer‘-i şerîf-i enverde, bâ‘isetü hâze’l-vesîka Cevher bt. Altun nâm nasrâniye mahzarında ikrâr ve takrîr-i kelâm edip, Mavne bt. Asvador nâm nasrâniyyenin gallesi Tanrıvermiş ve Bursa sürgünü ve Ankara cemâ‘ati kurâsı avârızına meşrûta vakıf olup, mahmiye-i mezbûrede Şeyh Ferhad mahallesinde vâki‘ bir tarafdan Nikogos ve bir tarafdan Abraham zımmîler mülkleri ve iki tarafdan tarîk-i âm ile mahdûd bir bâb tahtânî oda ve bir sofa ve bir sagīr şehnişin ve kenîfi müştemil vakıf menzil icâreteyn-i ma‘lûmeteyn ile babamız hâlik-i mezbûrun tasarrufunda olup, ba‘de helâkihî bize intikāl etmeğin hâlâ menzil-i mahdûd-ı mezkûru mütevellîsi işbu hâzır bi’l-meclis Toma v. Asvador’un izni ile merkūme Cevher’e on altı bin mangır bedel mukābelesinde asâleten ve vekâleten ferâğ ve tefvîz, ol dahi ber vech-i muharrer tefevvüz ve kabûl eylediğinden sonra bedeli olan meblağ-ı mezbûr on altı bin mangırı merkūme Cevher’den asâleten ve vekâleten bi’t-tamâm ahz u kabz eyledim. Ba‘de’l-yevm menzil-i mahdûd-ı mezkûr merkūme Cevher’in tasarrufunda olup bizim alâka ve medhalimiz kalmamışdır dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis aşer min Cumâdelâhire sene 1102. Şuhûdü’l-hâl: İbrahim Çelebi b. Ahmed, Derviş Beşe b. ( ), Memi Beşe b. ( ), Turgud Beşe b. ( ), Kirkor v. Kalos, Serkis v. Agob ve gayruhüm mine’l-huzzâr.