Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 703 Hüküm no: 764 Orijinal metin no: [116b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Viçko v. Kosta’nın Pınarca köyündeki odasının varisleri tarafından Mehmed b. Abdullah’a beş yüz akçeye satıldığı Mahmiye-i Edirne nevâhîsinden Üsküdar nâhiyesine tâbi‘ Pınarca nâm karyede sâkin iken bundan akdem hâlik olan Viçko v. Kosta nâm zimmînin sulbî oğlu Piyo v. Haroni ve sulbiye kızı Sahosti nâm sagīrlerin tesviye-i umûrlarına kıbel-i şer‘den mansûb vasîsi olan İstayko v. Velko nâm zimmî mahmiye-i Edirne’de meclis-i şer‘-i şerîfde işbu râfi‘ü’l-kitâb Mehmed b. Abdullah nâm kimesne muvâcehesinde ikrâr-ı tâm ve takrîr-i kelâm edip vasîsi olduğum sagīrân-ı mezbûrânın zarûret-i nafakaları olmağla babaları hâlik-i mezbûrdan intikāl edip karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd bir saman pûşîde odanın bey‘i lâzım gelmekle sûk-ı sultânîde mecma‘-i nâs olan mahalde mirâren ve kirâren müzâyede olundukda bin beş yüz akçede mezkûr Mehmed üzerinde karâr edip ziyâde ile tâlib-i âhar zuhûr etmemeğin ve semen-i mezbûr semen-i misli olduğunu sikāt ihbâr eyledikden sonra izn-i şer‘le bin beş yüz akçeye mezkûr Mehmed’e vesâyetim hasebiyle tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzere iştirâ ve tesellüm ve kabûl eyledikden sonra semen-i mezbûr bin beş yüz akçeyi vesâyetim hasebiyle mezkûr Mehmed yedinden bi’t-tamâm ve’l-kemâl ahz u kabz eyledim ba‘de’l-yevm zikrolunan saman pûşîde olan oda mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis aşer min-Şevvâli’l-mükerrem li-sene semân ve sittîn ve elf. Şühûdü’l-hâl: Mehmed Efendi, Salih Bey, İbrahim Bey [b.] Musa, Mustafa [b.] Hüseyin, Ali Çavuş ve gayruhüm.