Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 704 Hüküm no: 765 Orijinal metin no: [116b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Himmet’in dedeleri Halil’den satın aldığı Edirne’nin Topyolu mevkiindeki bağını merhum Mahmud b. Halil’in çocuklarına devrettiği Edirne sükkânından Mehmed b. Himmet nâm kimesne mahmiye-i mezbûrede meclis-i şer‘de mahmiye-i merkūme mahallâtından Hazînedâr Sinan Bey mahallesinde sâkin iken bundan akdem vefât eden Mahmud nâm kimesnenin sulbî sagīr oğulları Ahmed ve Mehmed ve sulbiye sagīre kızı Âişe’nin vâlideleri olup tesviye-i umûrlarına kıbel-i şer‘den mansûbe vasîleri olan Âişe bt. İsa nâm hâtun mahzarında ikrâr ve takrîr-i kelâm edip mahmiye-i mezbûre kurbünde Topyolu nâm mevzi‘de vâki‘ bir tarafdan İsmail nâm kimesne bağı ve bir tarafdan diğer İsmail nâm kimesne bağı ve bir tarafdan benim mülküm olan bağ ve bir tarafdan tarîk-ı âm ile mahdûd tahmînen dört dönüm bağ müteveffâ-yı mezbûrun mülkü olup ba‘de vefâtihî sıgār-ı mezbûrûnun hisse-i irsiyyelerine intikāl etmişiken [ve] mülk-i mevrûsları iken cedleri olup fevt olan Halil nâm kimesne hayatında zikrolunan bağı mülkümdür deyu bin kırk akçeye bana bey‘ ve teslîm ve kabz-ı semen eyleyip ve ben dahi tesellüm ve kabûl eylemişidim hâlâ zikrolunan bağ sıgār-ı mezbûrûnun mülk-i mevrûsları olmağla kasr-ı yed edip vasiyy-i mezbûra teslîm ol dahi tesellüm ve kabz eyledikden sonra semen-i merkūm bin kırk akçeyi cedleri müteveffâ-yı mezbûrdan sıgār-ı mezbûrûna intikāl eden terekesinden vesâyeten bana def‘ ü teslîm ve ben dahi bi’t-tamâm ahz u kabz edip zikrolunan bağa müte‘allik da‘vâdan sıgār-ı mezbûrûnun zimmetlerini ibrâ-i âm ile ibrâ ve ıskāt eyledim dedikde mukırr-ı mezbûrun ikrârını vasiyy-i merkūme vicâhen ve şifâhen tasdîk ve tahkīk edicek mâ-vaka‘a bi’t-taleb ketb olundu. Fi’l-yevmi’l-ışrîn min Ramazâni’l-mübârek li-sene semân ve sittîn ve elf. Şühûdü’l-hâl: Ahmed Beşe, Ali, Mehmed [b.] Ali, Hasan [b.] Ali, Mustafa [b.] Ahmed ve gayruhüm.