Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 710 Hüküm no: 776 Orijinal metin no: [118b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yani v. Mali’nin sattığı süt bedelinden İstoyo v. Yani’den bin yüz yirmi beş akçe alacağı olduğu Edirne nevâhîsinden Ada nâhiyesine tâbi‘ Bosnaköyü nâm karyede sâkin Yani v. Mali nâm zimmî mahmiye-i merkūmede meclis-i şer‘de İstoyo v. Yani nâm zimmî muvâcehesinde üzerine da‘vâ ve takrîr-i kelâm edip mezbûr İstoyo’ya her müdresi otuz beşer akçeye olmak üzere üç yüz elli müdre süd bey‘ ve teslîm edip ol dahi iştirâ ve tesellüm eyledikden sonra cem‘an semeni olan on iki bin iki yüz elli akçenin yedinden altı bin yüz yirmi beş akçesini ahz u kabz edip meblağ-ı bâkī altı bin yüz yirmi beş akçe zimmetinde kalmışidi hâlâ taleb ederim suâl olunup alıverilmek matlûbumdur dedikde gıbbe’s-suâl mezbûr İstoyo cevâbında müdde‘î-i mezbûrdan bir müdresi otuz beşer akçeye olmak üzere ancak yüz yetmiş beş müdre süd iştirâ ve kabz eyledim deyip ziyâde olan yüz yetmiş beş müdre süd iştirâsını inkâr edicek müdde‘î-i merkūmdan vech-i muharrer üzere ziyâdeyi mübeyyine beyyine taleb olundukda mahmiye-i mezbûreye tâbi‘ Polad nâm karyede sâkin Aleksi v. Hıristo ve Midkali nâm karyede sâkin Dimitri v. Andreya nâm zimmîler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ vech-i muharrer üzere merkūm İstoyo bizim huzûrumuzda müdde‘î-i mezbûrdan her müdresi otuz beşer akçeye olmak üzere üç yüz elli müdre süd iştirâ ve kabz eyledi biz bu husûsa bu vech üzere şâhidleriz şehâdet dahi ederiz deyu herbiri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiye şehâdetleri makbûle olmağın mûcibiyle ba‘de’l-hükm mâ-vaka‘a bi’t-taleb ketb olundu. Fi’l-yevmi’l-ışrîn min-Şevvâli’l-mükerrem li-sene semân ve sittîn ve elf. Şühûdü’l-hâl: Ahmed, Mehmed, Hasan b. Ali, Ahmed [b.] Yahya.