Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 709 Hüküm no: 775 Orijinal metin no: [118a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Raziye bt. Mustafa’nın Ali b. Hüseyin aleyhine açtığı alacak davasında iki bin üç yüz akçe üzerine sulh olup zimmetini ibra ettiği Mahrûse-i Edirne’de Daye Hâtun mahallesinde sâkin olan Râziye Hâtun bt. Mustafa meclis-i şer‘-i hatîr-i lâzimü’t-tevkīrde işbu bâ‘isü’l-kitâb Ali b. Hüseyin mahzarında tav‘an ikrâr ve takrîr-i kelâm edip mahalle-i merkūmede vâki‘ lede’l-ahâlî ve’l-cîrân ma‘lûmü’l-hudûd ve’l-mikdâr hadîka mahalle-i merkūmede sâkin iken bundan akdem vefât eden li-ebeveyn ammim Veli nâm kimesneden irs-i şer‘le bana intikāl eyledikden sonra hadîka-i merkūmemi mezbûr Ali’ye mukaddemâ dört bin beş yüz akçeye bey‘ ve teslîm ol dahi iştirâ ve kabûl etmişidi lâkin semeni olan meblağ-ı mezkûru bana bi’t-tamâm edâ ve teslîm etmedi deyu da‘vâ ve talebe mütesaddî olmuş idim el-hâletü hâzihî merkūm Ali beni vesâtet-i muslihîn ile da‘vâ-yı merkūmeden iki bin üç yüz akçe üzerine inşâ-i akd-i sulh eyledikde ben dahi sulh-ı mezbûru kabûl ve bedel-i sulh olan meblağ-ı merkūm iki bin üç yüz akçeyi merkūm Ali’nin yedinden tamâmen ahz u kabz mâ‘adâsı da‘vâsından mezbûr Ali’nin zimmetini ibrâ ve ıskāt eyledim fîmâ-ba‘d benden yâ vekîlimden husûs-ı mezbûra müte‘allik da‘vâ sudûr ederse lede’l-hükkâmi’l-kirâm mesmû‘a olmaya dedikde gıbbe’t-tasdîk mâ-vaka‘a bi’t-taleb ketb olundu. Fi’l-[yevmi’s]-sâbi‘ min-Zilka‘deti’ş-şerîfe li-sene semân ve sittîn ve elf. Şühûdü’l-hâl: Kurd Çelebi [b.] Mehmed, İbrahim Efendi el-imâm, Ahmed Çelebi [b.] Mehmed, İsmail Çelebi ve gayruhüm.