Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 711 Hüküm no: 778 Orijinal metin no: [118b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyis taifesinin talebi üzerine seyis mukaddemliğinin Hacı Ömer b. Ali’ye tevcihi Mahmiye-i İstanbul’da seyis tâifesinin mukaddemlerinden Ahmed b. Mansur ve Ali b. Mehmed ve Mansur b. Abdullah ve Ahmed Seravlu ve Mehmed b. Ebûifrît ve Mehmed Gavâşe ve Mehmed Ebnâyî ve sâirleri mahrûse-i Edirne’de meclis-i şer‘de herbiri takrîr-i kelâm edip mu‘tâd-ı kadîm üzere mâ-beynimizden müsinn ü ihtiyâr mukaddem lâzım ve mühim olmağın cümlemizin muhtârı olup müsinn ü ihtiyâr olan işbu râfi‘ü’r-rakīm el-Hâc Ömer b. Ali nâm kimesne mahall ü lâyık olmağın zikrolunan mukaddemlik taraf-ı saltanat-ı aliyyeden mezbûr el-Hâc Ömer’e tevcîh ve yedine berât-ı âlîşân verilmişdir nazar olunup mûcebince kıbel-i şer‘den yedine hüccet-i şer‘iyye verilmek matlûbumuzdur deyu tuğrâ-yı garrâ-yı sultânî ile mu‘anven ve târih-i kitâb senesi şehr-i Ramazânü’l-mübârek’in evâhiri tarihiyle müverrah berât-ı şerîf ibrâz edip nazar olundukda mazmûn-ı münîfi takrîrlerine muvâfık bulunmağın mûcebince savb-ı şer‘den işbu vesîka alâ mâ-hüve’l-hakīka ketb ve terkīm ve yedlerine def‘ ve teslîm olundu. Hurrire fi’l-yevmi’l-hâdî aşer min-Zilka‘deti’ş-şerîfe sene 1068. Şühûdü’l-hâl: İvaz Ağa b. Abdülkerim, Rıdvan Ağa b. Abdürrahim, Abdi Ağa b. Sinan, Salih Çelebi b. Musa, Arslan Beşe b. Halil, Mustafa Çelebi b. Mehmed, el-Hâc Sinan b. Abdi, Mustafa Çelebi b. Hasan, Mustafa Çelebi b. Mehmed, Ahmed b. Hasan ve gayruhüm mine’l-hâzırîn.