Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 712 Hüküm no: 779 Orijinal metin no: [119a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Matbah-ı âmire sakası Mehmed b. Osman’ın Sinan b. Ahmed tarafından bıçaklanarak öldürüldüğü Mahrûse-i Edirne’de Zeberced Adası demekle ma‘rûf mevzi‘de köprü kurbünde mecrûhan maktûl olan Matbah-ı âmire’de sakā tâifesinden Mehmed b. Osman nâm kimesnenin evliyâsından karîb ve ba‘îd kimesnesi olmayıp es-sultânü veliyyü men lâ veliyye leh fehvâsı üzere veliyyü’l-emr -hullidet hilâfetuhû ile’l-kazâ’i’d-dehr- taraf-ı pür-şereflerinden fermân-ı âlî ile da‘vâ-yı kısâsa me’mûr olan işbu bâ‘isü’l-kitâb umdetü’l-a‘yân mahrûse-i merkūmede emîn-i beytü’l-mâl olan Mehmed Ağa b. İbrahim meclis-i şer‘-i hatîr-i lâzimü’t-tevkīrde dîvân-ı âlî-sa‘âdetlerinden Sinan b. Ahmed mahzarında cânib-i saltanat-ı aliyyeden me’mûriyeti hasebiyle takrîr-i da‘vâ edip işbu târih-i kitâb Zilka‘desi’nin sekizinci günü vâki‘ olan erbi‘â günü vakt-i asırdan sonra merkūm Sinan mezbûr Sakā Mehmed ile gavga eylediklerinde mezbûr Sinan mezkûr Mehmed’i Zeberced Adası demekle [ma‘rûf] mevzi‘de köprü kurbünde alâ mele’i’n-nâs sarı saplı aşçı bıçağıyla amden sağ memesinin üstüne urup katl eylemişdir suâl olunup şer‘an mûcibi icrâ olunmak taleb ederim dedikde gıbbe’s-suâl ve’l-inkâr müdde‘î-i mezbûr Mehmed Ağa’dan müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden el-Hâc Mehmed Ağa b. Şa‘ban ve Hüseyin Bey b. Abdullah ve Mustafa Bey b. Musa nâm kimesneler li-ecli’ş-şehâde meclis-i şer‘a hâzırûn olup istişhâd olunduklarında fi’l-hakīka zikrolunan Zeberced Adası mevzi‘inde köprü kurbünde işbu târih-i kitâb Zilka‘desi’nin sekizinci günü yevm-i erbi‘âdır vakt-i asırdan sonra mezbûr Sinan bizim huzûrumuzda gavga edip mezkûr Mehmed’i sarı saplı aşçı bıçağıyla sağ memesinin üstüne amden urup katl eyledi biz bu husûsa bu vech üzere şâhidleriz şehâdet dahi ederiz deyu herbiri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiye şehâdetleri makbûle oldukdan sonra mûcibiyle hüküm birle mâ-vaka‘a bi’t-taleb ketb olundu. Fi’l-yevmi’t-tâsi‘ min-Zilka‘deti’ş-şerîfe li-sene semân ve sittîn ve elf. Şühûdü’l-hâl: Mehmed Efendi b. Ahmed el-kādî, Ali Efendi b. Mehmed el-kādî, Ya‘kub Efendi b. Mehmed el-kādî, Abdülkerim Efendi b. Yusuf el-kādî, Abdullah Efendi b. Mustafa el-kādî, Ahmed Efendi b. Mehmed el-kādî, Ömer Efendi b. Mehmed el-kādî, İsa Çelebi b. el-Hâc Bayram, Abdullah Efendi b. Ömer, İsmail b. el-Hâc Ramazan, Ahmed b. Ali, Mehmed b. Ahmed, Mehmed b. Ömer, Ali Efendi b. Mehmed, Mehmed Çelebi b. Sefer, Derviş Çelebi b. Haydar, Hasan Çelebi b. Hüseyin, Receb Çelebi b. Mehmed, Süleyman Çelebi b. ( ), Süleyman Ağa b. ( ) ve gayruhüm mine’l-hâzırîn.