Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 724 Hüküm no: 797 Orijinal metin no: [123a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hori bt. Minas’ın Mehmed b. Mustafa’nın babasından alacağı olduğu iddiasıyla açtığı davada iddiasını ispat edemediği Mahmiye-i Edirne hısnı dâhilinde el-Hâc Doğan mahallesinde sâkine Huri bt. Minas nâm Ermeniye meclis-i şer‘de işbu sâhibü’l-kitâb Mehmed b. Mustafa nâm kimesne mahzarında üzerine da‘vâ ve takrîr-i kelâm edip mezkûr Mehmed’in babası olup bundan akdem vefât eden merkūm Mustafa hâl-i hayâtında bi-gayri vechin benim yedi bin akçemi ahz u kabz eylemişidi hâlâ mezbûr Mehmed oğlu ve hasran vârisi olup muhallefâtına vâzı‘u’l-yed olmağla meblağ-ı mezbûru müteveffâ-yı merkūmun tereke-i vâfiyyesinden olmak üzere mezkûr Mehmed’den taleb ederim suâl olunup alıverilmek matlûbumdur dedikde gıbbe’s-suâl mezbûr Mehmed cevâbında babam müteveffâ-yı mezbûra gāibe ani’l-meclis Âişe nâm hâtunun yedi bin akçe deyni olmağla meblağ-ı mezbûra merkūme [Hori bt.] Minas emr ve kabûlü hâviye kefâlet ile kefîl olmağın babam müteveffâ-yı mezkûr meblağ-ı merkūmu kefâleti hasebiyle merkūme [Hori bt.] Minas’dan huzûr-ı hâkimü’ş-şer‘de da‘vâ ve taleb eyledikde mezbûre [Hori bt.] Minas dahi meblağ-ı mezbûra kefâletini ikrâr edicek edâsına hükm-i şer‘î lâhık oldukdan sonra meblağ-ı mezbûrun edâsı lâzım gelmekle babam müteveffâ-yı mezbûra def‘ ve teslîm eylediği yedi bin akçe cihet-i kefâletden olan meblağ-ı mezbûrdur dedikde isre’l-istintâk merkūme [Hori bt.] Minas vech-i muharrer üzere merkūme Âişe’nin deyni olan yedi bin akçeye kefâletini inkâr edicek merkūm Mehmed’den sıdk-ı makālini mübeyyine beyyine taleb olundukda udûl-i ahrâr-ı ricâlden olup mahmiye-i mezbûrede Mezid Bey mahallesinde sâkin Hasan Beşe b. Mustafa ve Şarabdâr Hamza Bey mahallesinde sâkin Mehmed b. Abdullah nâm kimesne[ler] li-ecli’ş-şehâde meclis-i şer‘de hâzırân olup istişhâd olunduklarında fi’l-hakīka vech-i muharrer üzere müteveffâ-yı mezbûra hayâtında gāibe ani’l-meclis mezbûre Âişe’nin deyni olan yedi bin akçeye bizim huzûrumuzda mezbûre [Hori bt.] Minas emr ve kabûlü hâviye kefâlet ile kefîl oldu ve müteveffâ-yı merkūm hayâtında mezbûre [Hori bt.] Minas’a def‘ ü teslîm eylediği yedi bin akçe cihet-i kefâletden deyni olan yedi bin akçedir biz bu husûsa bu vech üzere şâhidleriz şehâdet dahi ederiz deyu herbiri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiye şehâdetleri makbûle olmağın mezbûre [Hori bt.] Minas bî-vech ta‘arruzdan men‘ birle mâ-vaka‘a bi’t-taleb ketb olundu. Fi’l-yevmi’l-ışrîn min-Zilka‘deti’ş-şerîfe li-sene semân ve sittîn ve elf. Şühûdü’l-hâl: Mehmed [b.] Mustafa, Kutb[eddin] İsmail, Ahmed Çelebi, Bayram Beşe, Arslan Beşe, Ali Bey ve gayruhüm.