Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 723 Hüküm no: 796 Orijinal metin no: [122b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Manuk v. Ahi’nin Mısırlı Yanaki’den olan alacağına kefil olan Manolaki v. Kostantin’den üç bin guruş alacağını varislerinin tahsil ettiği Mahmiye-i İstanbul’da Cücüçeşmesi kurbünde sâkin iken bundan akdem hâlik olan Manuk v. Ahi nâm Ermeni’nin verâseti zevce-i metrûkesi Yakutşah bt. Ferhad ve sulbî kebîr oğulları Artun ve Avanos ve sulbiye kebîre kızları Narkdis ve Horpsima’ya münhasıra olduğu şer‘an mütebeyyin oldukdan sonra mezbûr Artun asâleten ve mezbûrûn Yakutşah ve Avanos ve Narkdis ve Horpsima taraflarından husûs-ı âti’l-beyâna vekîl olup Yorgi v. Andrina ve Manol v. Angeli nâm zimmîler şehâdetleri ile nehc-i şer‘î üzere vekâleti sâbite oldukdan sonra vekâleten mahmiye-i Edirne’de meclis-i şer‘-i hatîr-i lâzimü’t-tevkīrde işbu râfi‘ü’s-sifr Manolaki v. Kostantin nâm zimmî muvâcehesinde asâleten ve vekâleten ikrâr-ı tâm ve takrîr-i kelâm edip mûrisimiz hâlik-i mezbûrun gāib ani’l-meclis Mısırlı Yanaki nâm zimmî zimmetinde üç bin kıt‘a riyâlî guruş hakkı olup meblağ-ı mezbûra merkūm Manolaki emr [ve] kabûlü hâviye kefâletle kefîl oldukdan sonra kable’l-ahz mûrisimiz Manuk hâlik olmağla meblağ-ı mezbûr irsen bize intikāl etmeğin biz dahi kefâleti hasebiyle mezbûr Manolaki yedinden mukaddemâ iki bin kıt‘a riyâlî guruşunu ahz u kabz edip cihet-i kefâletden zimmetinde bin kıt‘a riyâlî guruş kalmışidi hâlâ asâlet ve vekâletim hasebiyle üç yüz riyâlî guruşunu alıp bâkī yedi yüz riyâlî guruş da‘vâsından fâriğ olup vechen mine’l-vücûh da‘vâ ve nizâ‘ımız yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-ışrîn min-Zilka‘deti’ş-şerîfe li-sene semân ve sittîn ve elf. Şühûdü’l-hâl: Mehmed [b.] Mustafa, İsmail Efendi, Bayram Beşe, Arslan Çukadâr, İsa Bey, Osman Çavuş b. Mustafa, Ahmed Çelebi, Hasan Beşe b. Veli, Mustafa Efendi b. Musa, Mehmed Çavuş b. Yusuf, Osman Çavuş b. Sefer, Muharrem b. Mahmud, Nasûh [b.] Mehmed, Mehmed Çelebi b. Şa‘ban, Kenan Ağa, Ahmed Bey b. Mahmud, Mehmed Çelebi b. Mustafa ve gayruhüm.