Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 726 Hüküm no: 800 Orijinal metin no: [123b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hayrabolulu Ayşe bt. Hüseyin’in kardeşi Ali’den üç bin akçe alarak ölen ebeveynin terekesi hususunda zimmetini ibra ettiği Kasaba-i Hayrabolu’da el-Hâc Hızır mahallesinde sâkine Âişe bt. Hüseyin nâm hâtun meclis-i şer‘de işbu bâ‘isü’r-rakīm li-ebeveyn karındaşı Ali nâm kimesne mahzarında ikrâr ve takrîr-i kelâm edip mezbûr Ali bundan akdem vefât eden mezbûr Hüseyin’in terekesine vâzı‘u’l-yed olmağla tereke-i müteveffâ-yı mezbûrdan benim hisse-i şer‘iyyeme isâbet eden üç sehimden bir sehm hisse-i irsiyyem mezbûr Ali zimmetinde kalmışidi hâlâ zikrolunan bir sehm hisse-i irsiyyem mukābilesinde mezbûr Ali yedinden üç bin akçe ahz u kabz edip babam müteveffâ-yı mezbûrdan bana intikāl eden üç sehimden bir sehm hisse-i irsiyyem da‘vâsından fâriğa olup babam müteveffâ-yı mezbûrun terekesine ve müteveffâ-yı merkūmdan mukaddem fevt olan vâlidem Âmine nâm hâtunun terekesine müte‘allik vechen mine’l-vücûh mezbûr Ali ile da‘vâ ve nizâ‘ım yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî gurreti Zilka‘deti’ş-şerîfe li-sene semân ve sittîn ve elf. Şühûdü’l-hâl: Mehmed Efendi el-müderris, Hasan [b.] Abdullah, Mehmed Çavuş, Mustafa b. Mehmed, İbrahim [b.] Aydın.