Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 727 Hüküm no: 803 Orijinal metin no: [124a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan b. Hızır’ın Ahmed Bey b. Ali zimmetinde kendisine çiftlik satın almak üzere verdiği on bin beş yüz akçe alacağı olduğu Mahmiye-i Edirne’de Ali Paşa mahallesinde sâkin iken bundan akdem vefât eden Hızır b. ( ) nâm kimesnenin sulbî sagīr oğlu Hasan’ın kıbel-i şer‘den mansûbe vasîsi ve vâlidesi olan Rahime bt. Derviş nâm hâtun mahmiye-i Edirne’de meclis-i şer‘de Ahmed Bey b. Ali mahzarında bi’l-vesâye üzerine da‘vâ ve takrîr-i kelâm edip sagīr-i mezbûra çiftlik iştirâ edivermek için sagīr-i mezbûrun mâl-ı mevrûsundan vesâyetim hasebiyle mezbûr Ahmed Bey yedine on bin beş yüz akçe def‘ ü teslîm edip ol dahi ahz u kabz ve hâlâ zimmetimdedir deyu alâ re’si’l-işhâd ikrâr dahi etmişken hâlâ vermede te‘allül eder suâl olunup alıverilmek matlûbumdur dedikde gıbbe’s-suâl ve akībe’l-inkâr mezbûre Rahime Hâtun’dan müdde‘âsını mübeyyine beyyine taleb olundukda udûl-i ricâlden olup mahmiye-i mezbûrede Yıldırım mahallesinde sâkin Hamza b. Mustafa nâm kimesne li-ecli’ş-şehâde meclis-i şer‘a hâzır olup isre’l-istişhâd fi’l-vâki‘ benim huzûrumda merkūm Ahmed Bey sagīr-i mezbûra çiftlik iştirâ edivermek için vasîsi ve vâlidesi merkūme Rahime yedinden sagīr-i mezbûrun mâl-ı mevrûsundan altı bin beş yüz akçe ahz u kabz eyledim ve hâlâ zimmetimdedir deyu ikrâr ve beni işhâd eyledi ben bu husûsa bu vech üzere şâhidim şehâdet dahi ederim deyu edâ-i şehâdet-i şer‘iyye ettikden sonra yine udûl-i ricâlden Câmi‘-i atîk imâmı olan Ömer Efendi b. Receb ve Ali b. Murad nâm kimesneler li-ecli’ş-şehâde meclis-i şer‘a hâzırân olup istişhâd olunduklarında şâhid-i asl olan Şâtır Mehmed Ağa b. Abdülkerim nâm kimesne sefere müteveccih olduğu hâlde benim huzûrumda merkūm Ahmed Bey sagīr-i mezbûra çiftlik iştirâ edivermek için vasîsi ve vâlidesi merkūme Rahime yedinden sagīr-i mezbûrun mâl-ı mevrûsundan altı bin beş yüz akçe ahz u kabz eyledim ve hâlâ zimmetimdedir deyu ikrâr ve beni işhâd eyledi ben bu husûsa bu vech üzere şâhidim şehâdet dahi ederim hâlâ ben sefere müteveccih olmağla siz dahi benim lisânımdan şâhid olup şehâdet edin deyu şehâdetini bize tahmîl edip ve biz dahi şehâdeti tahammül ve ba‘de’l-kabûl merkūm Mehmed Ağa lisânından bu husûsu bu vech üzere şâhidleriz şehâdet dahi ederiz deyu herbiri edâ-i şehâdet-i şer‘iyye ettiklerinde şehâdetleri makbûle oldukdan sonra mûcebince ba‘de’l-hükm mâ-vaka‘a bi’t-taleb ketb olundu. Fi’l-yevmi’l-ışrîn min-Zilka‘deti’ş-şerîfe li-sene semân ve sittîn ve elf. Şühûdü’l-hâl: Mehmed Efendi b. Mustafa el-kādî, İsmail b. Muharrem el-kādî, Bayram Beşe, Halil Çelebi b. Eyüb.