Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 735 Hüküm no: 813 Orijinal metin no: [126a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Ağa b. Ali’nin Babadağı kazasına bağlı Armutlu köyündeki çiftliğini içerisindeki müştemilatıyla birlikte Mazlum Mustafa Ağa b. Abdi’ye satıp bazı arazisinin de kullanım hakkını devrettiği Medîne-i Babadağı sâkinlerinden kıdvetü’l-emâsil ve’l-akrân İbrahim Ağa b. Ali nâm kimesne meclis-i şer‘-i hatîr-i lâzimü’t-tevkīrde li-üm karındaşı iftihârü’l-emâcid ve’l-ekârim câmi‘u’l-mehâmid ve’l-mekârim Mazlûm Mustafa Ağa b. Abdi nâm kimesne tarafından ikrâr-ı âti’z-zikri tasdîka vekîl olup el-Hâc İbrahim Bey b. Ahmed ve Mustafa Bey [b.] Ramazan nâm kimesneler şehâdetleriyle şer‘an vekâleti sâbite olan Atâullah Bey b. Abdürrezzâk nâm kimesne mahzarında ikrâr ve takrîr-i kelâm edip Babadağı kazâsına tâbi‘ Armudlu nâm karyede vâki‘ silk-i mülkümde münselik olup [126b] Odabaşı Çiftliği demekle ma‘rûf tahdîd ve tavsîfden müstağnî bir fevkānî odayı ve bir sofayı ve bir tahtânî odayı ve altında ahırı ve üç göz anbarı ve bir öküz ahırını ve bir samanlığı ve iki hergele havlusunu ve bi’r-i mâyı ve bostanı müştemil çiftlik ta‘bîr olunur mülk menzilimi âmme-i tevâbi‘ ve levâhıkı ile ve kâffe-i hukūk ve merâfıkı ile ve çiftlik-i mezbûr kurbünde cereyân eden nehir üzere dâir iki göz cemî‘ değirmenimi seng-i zîrleriyle çiftlik-i mezbûr içinde mevcûd mülküm olan İvan nâm gulâm ile Alfenta nâm câriyemi ve on iki re’s camus öküzü ve yirmi dört re’s karasığır öküzü ve on re’s karasığır ineği ve on re’s dana ve tosun ve on beş re’s aygırıyla kısrak ve üç âlâtıyla pulluk demiri ve iki araba otluğa ve altı tırpan ve bir bakraç ve bir tencere ve bir sahan ve der-anbar üç yüz keyl buğday ve elli keyl-i İstanbulî şa‘îr ve elli keyl-i İstanbulî alef ve elli keyl-i İstanbulî erzimi müvekkil-i mûmâ-ileyh Mustafa Ağa’ya seksen bin nakd-i râyic [fi’l]-vakt akçeye safka-i vâhide ile bey‘-i bâtt-ı sahîh-i şer‘î ile bey‘ edip ol dahi vech-i muharrer üzere iştirâ ve kabûl eyledikden sonra çiftlik-i mezbûra tâbi‘ olup ma‘an tasarruf olunan lede’l-ahâlî ve’l-cîrân ma‘lûmü’l-hudûd tarla ve üç kıt‘a çayırın dahi hakk-ı tasarruflarını ma‘rifet-i sâhib-i arz ile on bin akçe bedel mukābilesinde mûmâ-ileyh Mustafa Ağa’ya ferâğ ve tefvîz edip ol dahi tefevvüz ve kabûl eyledikden sonra semen-i mezbûr ile mezkûr cem‘an doksan bin akçeyi li-üm karındaşım mezkûr Mustafa Ağa’ya zimmetimde lâzimü’l-edâ ( ) akçe deynim olmağla meblağ-ı mezbûrun doksan bin akçesine takās ve ol dahi mukāssa eyleyip zikrolunan çiftlik ve bostan ve değirmen ve a‘yân-ı (eşyâ-yı) mastûrenin mecmû‘unu mülkiyet üzere ve zikri mürûr eden tarla ve çayırları emsâli tasarrufu gibi tasarruf etmek için mahallinde kabza müşârun-ileyh Mustafa Ağa’yı taslît eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ aşer min-Zilhicceti’ş-şerîfe li-sene semân ve sittîn ve elf. Şühûdü’l-hâl: A‘lemü’l-ulemâ’i’l-izâm Abdüllatif Efendi eş-şehîr bi-Müderriszâde, Fahrü’l-akrân Osman b. Kasım, Ömer Ağa b. Davud, Mustafa Ağa b. İbrahim, Receb b. Mustafa, Hüseyin Çelebi b. ( ).