Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 741 Hüküm no: 823 Orijinal metin no: [128b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Çavuş b. Mehmed’in Edirne’nin Takyecibaşı mahallesindeki menzilini yirmi beş bin akçeye Şahin Çavuş b. Mehmed Bey’e sattığı Mahmiye-i İstanbul’da Murad Paşa-yı atîk mahallesinde sâkin olup hâlâ mahrûse-i Edirne’de müsâfir olan Hasan Çavuş b. Mehmed nâm kimesne meclis-i şer‘de işbu bâ‘isü’l-kitâb Şahin Çavuş b. Mehmed Bey nâm kimesne mahzarında ikrâr ve takrîr-i kelâm edip mahmiye-i mezbûre hısnı hâricinde Takyecibaşı mahallesinde vâki‘ ammim Topal [129a] Mustafa nâm kimesneden bana intikāl eden bir tarafdan Katırcı Ali mülkü ve bir tarafdan İplikçi el-Hâc Mustafa mülkü ve bir tarafdan Na‘lbend ( ) mülkü ve bir tarafdan tarîk-ı âm ile mahdûd üç fevkānî odayı ve tarîk-ı âm üzerine şehnişini ve kenîfi ve iki tahtânî odayı ve bi’r-i mâyı ve eşcâr-ı müsmire ve gayr-ı müsmire bahçeyi müştemil olan mülk-i mevrûsumuzu mezbûr Şahin Çavuş’a yirmi beş bin fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi iştirâ ve kabûl eyledikden sonra semeni olan meblağ-ı mezbûr yirmi beş bin akçeyi yedinden bi’t-tamâm ahz u kabz eyleyip menzil-i mahdûd-ı mezkûru mahallinde kabza mezbûr Şahin Çavuş’u taslît eyledim dedikde gıbbe’t-tasdîkı’ş-şer‘î mâ-vaka‘a bi’t-taleb sebt olundu. Fi’l-hâmis ve’l-ışrîn min-Zilhicceti’ş-şerîfe li-sene semân ve sittîn ve elf. Şühûdü’l-hâl: Mustafa Ağa kethüdâ, Mehmed Efendi, Kutbeddîn Efendi, Mehmed Çavuş b. Mustafa, Mustafa Çavuş b. Nuh, Abdurrahman Çavuş, Sarıca İbrahim, Mahmud Çavuş, Mehmed Çavuş, Ahmed Çavuş, Sefer Çavuş, Ahmed Çavuş, Ali Bey [b.] Sefer ve gayruhüm mine’l-hâzırîn.