Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 742 Hüküm no: 825 Orijinal metin no: [129a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Artin ve Sultan’nın babaları Emre’den kendilerine kalan bazı eşyaları aldığı iddiasıyla Şehri bt. Kazar aleyhine açtıkları davada iddialarını ispat edemedikleri Mahmiye-i Edirne’de Yahşi Fakih mahallesinde sâkin iken bundan akdem hâlik olan Emre nâm Ermeni’nin verâseti sulbî kebîr oğlu Artin ve sulbiye kebîre kızı Sultan nâm Nasrâniye’ye münhasıra olduğu şer‘an mütehakkık oldukdan sonra mezbûrân Artin ve Sultan mahmiye-i mezbûrede meclis-i şer‘de Şehri bt. Kazar nâm Nasrâniye mahzarında herbiri üzerine da‘vâ ve takrîr-i kelâm edip babamız hâlik-i merkūmun metrûkâtından dört aded Keşan dârâyîsi kaftan ve bir ibrişim alaca kaftan ve üç aded altınlı dîbâ arakıyye bir yüksek arakıyye ve bir hamam örtüsü ve sarı iki kemha zıbın ve bir kırmızı kemhâ zıbın ve dört gömlek ve dört don ve bir sırmalı kîse ve bir sîm raht kuşak ve ortası altın bir ön kuşak bu cümle eşyâyı bi-gayri vechin ahz u kabz eylemişdir suâl olunup alıverilmek matlûbumdur dediklerinde gıbbe’s-suâl ve akībe’l-inkâr müdde‘iyân-ı mezbûrân[dan] müdde‘âlarını mübeyyine beyyine taleb olundukda ikāmet-i beyyine için istimhâl etmeğin mehl-i şer‘î imhâl olunup mâ-vaka‘a bi’t-taleb ketb olundu. Fî evâsıtı Şevvâli’l-mükerrem li-sene semân ve sittîn ve elf. Şühûdü’l-hâl: Mehmed Çelebi b. Mustafa, İsmail, İsa Bey, Ahmed Çelebi b. Mehmed.