Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 747 Hüküm no: 834 Orijinal metin no: [130b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Çelebi ile kardeşleri Mustafa ve Ali’nin babaları merhum Ali Bey’den kendilerine intikal eden cariyeyi anneleri Selime Hatun’a on bin akçeye sattıkları Edirne’de Beşdoğan? mahallesi sâkinlerinden olup mahmiye-i Edirne’de bundan akdem vefât eden Ali Bey b. Kasım’ın verâseti zevce-i metrûkesi Selime bt. Kurd Ali’ye ve sulbî kebîr oğlu Ahmed Çelebi’ye ve sulbî sagīr oğulları Mustafa ve Ali’ye münhasıra olduğu şer‘an mütehakkık oldukdan sonra mezbûr Ahmed Çelebi kendi tarafından asâleten ve sagīrân-ı merkūmânın kıbel-i şer‘den mansûb vasîsi olmağla vesâyeten meclis-i şer‘-i hatîr-i lâzimü’t-tevkīrde mezbûre Selime mahzarında üzerine da‘vâ ve takrîr-i kelâm edip mûrisimiz müteveffâ-yı merkūmun câriye-i memlûkesi olup ba‘de vefâtihî bana ve sagīrân-ı mezbûrân ile [131a] merkūme Selime’ye bi-hasebi’l-irsi’ş-şer‘î intikāl eden açık kaşlı göğ elâ gözlü orta boylu Rusiyyetü’l-asl Müslimetü’l-mille Canfeda nâm cariyenin zarûret-i deyn için bey‘i lâzım gelmeğin mezbûre Canfeda sûk-ı sultânîde müzâyede olunup rağabât-ı nâs münkatı‘ oldukdan sonra mezbûre Selime üzerinde on bin akçede karâr ve ziyâde ile tâlib-i âhar olmayıp ve meblağ-ı mezbûr semen-i misli olmağla câriye-i mevsûfe-i mezbûreyi merkūme Selime’ye on bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi iştirâ ve tesellüm ve kabûl eyledikden sonra mezbûre Selime’ye zevci müteveffâ-yı merkūm Ali’nin cümle terekesinden ber-mûceb-i defter-i kassâm sümün hisse-i şer‘iyyesine isâbet eden iki bin yüz elli akçe ve müteveffâ-yı merkūm zimmetinde müsbet olan iki bin iki yüz akçe mehr-i müeccel ve müteveffâ-yı mezbûrun mezbûre Selime’ye bir çuka ferâce bahâsından zimmetinde deyni olduğu müsbet olan sekiz yüz akçe ki cem‘an beş bin yüz elli akçe hakkını asâlet ve vesâyetim hasebiyle semen-i mezbûr on bin akçenin beş bin yüz elli akçesine takās ve ol dahi mukāssa eyleyip semen-i mezkûrdan merkūm Selime zimmetinde bâkī kalan dört bin sekiz yüz elli akçeyi hâlâ taleb eylediğimde vermede te‘allül eder suâl olunup alıverilmek matlûbumdur dedikde gıbbe’s-suâl mezbûre Selime cevâbında fi’l-vâki‘ vech-i muharrer üzere câriye-i mezkûreyi on bin akçeye iştirâ ve kabz edip ve semen-i mezbûrun beş bin iki yüz elli akçesini mezbûr Ahmed Çelebi asâlet ve vesâyeti hasebiyle zevcim müteveffâ-yı mezbûrun cümle terekesinden ber-mûceb-i defter-i kassâm sümün hisseme isâbet eden iki bin yüz elli akçe ve müsbet mehr-i müeccelim olan iki bin iki yüz akçe ve müteveffâ-yı mezbûr zimmetinde çuka bahâsından müsbet olan sekiz yüz akçe hakkım cem‘an beş bin iki yüz elli akçe hakkıma takās ve ben dahi mukāssa eyleyip semen-i mezkûrdan bâkī kalan dört bin sekiz yüz akçe zimmetimde deynimdir deyu ikrâr etmeğin mûcebince meblağ-ı mezbûru vasiyy-i merkūma edâya tenbîh birle mâ-vaka‘a bi’t-taleb ketb olundu. Fî gurreti Zilhicceti’ş-şerîfe li-sene semân ve sittîn ve elf. Şühûdü’l-hâl: Mehmed b. Mustafa, İsmail Efendi, Bayram Beşe, İsa Bey [b.] Ahmed.