Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 748 Hüküm no: 836 Orijinal metin no: [131b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Beşir Çelebi’nin babası merhum Mehmed Ağa’nın sattığı iki karasığır öküzü bedelinden Yorgi v. Baratil’den bin dört yüz akçe alacağı olduğu Medîne-i Edirne’de Malkoç mahallesinde sâkin iken bundan akdem vefât eden Mehmed Ağa’nın sulbî oğlu olup hasran vârisi olan işbu bâ‘isü’l-kitâb Beşir Çelebi nâm şâbb-ı emred meclis-i şer‘de medîne-i merkūmeye tâbi‘ Üsküdar nâm karye ahâlîsinden Yorgi v. Baratil nâm zimmî mahzarında üzerine da‘vâ ve takrîr-i kelâm edip babam müteveffâ-yı merkūm zimmî-i merkūma târih-i kitâbdan bir buçuk sene mukaddem iki re’s güdük karasığır öküzünü safka-i vâhide ile bin dört yüz akçeye bey‘-i bâtt-ı sahîh-i şer‘î ile bey‘ ve teslîm ol dahi iştirâ ve kabûl edip semen-i merkūmu kable’l-istîfâ fevt olmağla zimmetinde kalmışidi hâlâ verâsetim hasebiyle taleb ederim dedikde gıbbe’s-suâl ve’l-inkâr ve isre’l-istişhâd udûl-i ahrâr-ı ricâlden Memi b. Ömer ve Hasan b. Eyüb nâm kimesneler li-ecli’ş-şehâde meclis-i şer‘a hâzırân olup fi’l-hakīka müteveffâ-yı merkūm bizim huzûrumuzda târih-i kitâbdan bir buçuk sene mukaddem iki re’s güdük karasığır öküzünü safka-i vâhide ile bin dört yüz akçeye bey‘-i bâtt-ı sahîh-i şer‘î [ile] bey‘ ve teslîm merkūm Yorgi zimmî iştirâ ve kabûl ve kabz eyledi biz bu husûsa bu vech üzere şâhidleriz şehâdet dahi ederiz deyu herbiri edâ-i şehâdet-i şer‘iyye ettiklerinde gıbbe’t-ta‘dîl ve’t-tezkiye şehâdetleri makbûle olmağın mûcebince hüküm birle mâ-vaka‘a [bi’t-taleb ketb olundu.] Şühûdü’l-hâl: Ahmed b. Mehmed, Hasan Çelebi b. Pîrî, Bayram Beşe, Arslan.