Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 749 Hüküm no: 837 Orijinal metin no: [131b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Praşkova’nın mirasının amcası oğulları varken amcası kızı Marta bt. Yuvan’a intikal etmeyeceği Edirne’de Sitti Hâtun mahallesinde sâkine Marta bt. Yuvan nâm Nasrâniye meclis-i şer‘de mahalle-i merkūmede sâkin iken bundan akdem hâlik olan Praşkova nâm zimmînin li-ebeveyn ammi oğulları ve hasran vârisleri olan Dimitri nâm zimmî ile Tanaş nâm zimmî üzerine da‘vâ ve takrîr-i kelâm edip mezbûrân Dimitri ve Tanaş hâlik-i mezbûrun li-ebeveyn ammi oğulları olmağla cümle terekesine vaz‘-ı yed edip hâlâ ben dahi hâlik-i mezbûrun li-ebeveyn ammi kızı olduğum hasebiyle mezbûrândan hisse[mi] taleb ederim [deyicek] vermede te‘allül ederler dedikde hâlik-i mezbûrun li-ebeveyn ammi oğulları var iken ammi kızı mîrâsdan mahrûm olduğu mütehakkık olmağın bî-vech mu‘ârazadan men‘ birle mâ-vaka‘a [bi’t-taleb ketb olundu.] [Fi’l]-Muharremi’l-harâm li-sene tis‘a ve sittîn ve elf. Şühûdü’l-hâl: es-Sabıkūn, Mehmed b. Mustafa, Bayram, Kutbeddin.