Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 751 Hüküm no: 840 Orijinal metin no: [132b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Bey b. Hacı Mustafa’nın Ümmühan bt. Mustafa’dan beş bin akçe alacağı olduğu Mahmiye-i Edirne’de Muradiye mahallesinde sâkin Mehmed Bey b. el-Hâc Mustafa nâm kimesne meclis-i şer‘de işbu sâhibetü’l-kitâb Ümmühan bt. Mustafa nâm hâtun mahzarında üzerine da‘vâ ve takrîr-i kelâm edip mezbûr Ümmühan’a beş [bin] akçe ikrâz ve teslîm edip ol dahi istikrâz ve kabz edip ve mukābilesinde bir inci saçlık ve bir inci depelik rehin vaz‘ ve teslîm ve ben dahi irtihân ve kabz eyledikden sonra bir def‘a dahi yirmi bin akçe ikrâz ve teslîm edip ol dahi istikrâz ve kabz edip cem‘an yirmi beş bin akçe bana deyni olmağla hâlâ taleb ederim suâl olunup alıverilmek matlûbumdur dedikde gıbbe’s-suâl mezbûre Ümmühan cevâbında müdde‘î-i mezbûra ancak beş bin akçe deynim vardır deyu ikrâr ve ziyâdeyi inkâr edicek müdde‘î-i mezbûrdan müdde‘âsını mübeyyine beyyine taleb olundukda ikāmet-i beyyineden izhâr-ı acz edip istihlâf etmeğin mezbûre Ümmühan’ın vech-i muharrer üzere müdde‘î-i mezkûra beş bin akçe[den] ziyâde yirmi bin akçe deyni dahi olmadığına mezbûre Ümmühan’a yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-azîm etmeğin ikrârı mûcebince meblağ-ı mezbûr beş bin akçeyi müdde‘î-i mezbûr a teslîme mezbûre Ümmühan’a tenbîh olunup mâ-vaka‘a bi’t-taleb ketb olundu. Fi’s-sâmin mine’l-Muharremi’l-harâm li-sene tis‘a ve sittîn ve elf. Şühûdü’l-hâl: Kasım b. İbrahim, Mahmud b. Hüseyin, el-Hâc Nasûh b. Ali, Ahmed Çelebi b. Ali.