Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 750 Hüküm no: 839 Orijinal metin no: [132a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Abdullah’ın kendisine başkasının bağını kendi mülkü gibi satan Ayşe bt. Bayram’dan ödediği paranın bir kısmını alıp diğer kısmı için de zimmetini ibra ettiği Edirne’de İbrahim Paşa [mahallesin]de sâkin Mehmed b. Abdullah meclis-i şer‘de Âişe bt. Bayram mahzarında ikrâr edip medîne-i mezbûre tevâbi‘inden Süle nâm karye sınırı dâhilinde vâki‘ bir tarafdan Tavîl Eleni bağı ve bir tarafı Mehmed bağı ve bir tarafdan Malkoç bağı ve bir tarafı Kureş bağı ile mahdûd olup tahmînen üç dönüm bağı mezbûre Âişe mülkümdür deyu târih-i kitâbdan beş sene mukaddem bana bin üç yüz akçeye bey‘-i kat‘î ile bey‘ ve teslîm ve ben dahi iştirâ ve kabz etmişidim hâlâ zikrolunan bağ Ahmed b. Kalender nâm kimesnenin mülkü olduğu huzûr-ı hâkimde isbât ve zikrolunan bağ vech-i şer‘î üzere mezbûr Ahmed’e hükmolundukdan sonra ben dahi merkūme Âişe’ye def‘ eylediğim bağ semeni olan bin üç yüz akçemi taleb eylediğimde mezbûre Âişe dahi zikrolunan bağı vech-i muharrer üzere bana bin üç yüz akçeye bey‘ ve teslîm eylediğini ikrâr eyledikden sonra ben dahi semen-i mezbûr bin üç yüz akçenin sekiz yüz akçesini yedinden ahz u kabz edip ve semen-i merkūmdan bâkī kalan beş yüz akçe da‘vâsından mezbûre Âişe’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis mine’l-Muharremi’l-harâm li-sene tis‘a ve sittîn ve elf. Şühûdü’l-hâl: Mehmed b. Mustafa, Mehmed, İsmail b. ( ), Bayram Beşe, İsa Bey.