Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 752 Hüküm no: 842 Orijinal metin no: [132b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Abdülkādir’in babasından kendisine kalan bağına Halil b. İbrahim’in müdahalesinin engellenmesi Mahmiye-i Edirne’de İbrahim Paşa mahallesinde sâkin iken bundan akdem vefât eden Abdülkadir nâm kimesnenin verâseti sulbî kebîr oğlu Ahmed’e münhasıra olduğu şer‘an mütehakkık oldukdan sonra mezbûr Ahmed meclis-i şer‘de Halil b. İbrahim nâm kimesne mahzarında üzerine da‘vâ ve takrîr-i kelâm edip mahmiye-i mezbûreye tâbi‘ Süle nâm karye sınırı dâhilinde vâki‘ bir [tarafdan] Tavîl Dede bağı ve bir tarafdan Mehmed bağı [ve] bir tarafan Malkoç bağı [ve] bir tarafdan Kureş bağı ile mahdûd tahmînen üç dönüm bağ babam müteveffâ-yı mezbûrun ile’l-vefât mülkü olup ba‘de vefâtihî bana intikāl etmişiken mezbûr Halil bî-vech vaz‘-ı yed etmişdir suâl olunup kasr-ı yedine tenbîh olunmak matlûbumdur dedikde gıbbe’s-suâl mezbûr Halil zikrolunan bağa vaz‘-ı yedini ikrâr ve vech-i muharrer üzere müteveffâ-yı mezbûr Abdülkadir’in mülkü olduğunu inkâr edicek müdde‘î-i mezbûrdan müdde‘âsını mübeyyine beyyine taleb olundukda [133a] udûl-i ricâlden olan Mehmed b. Hüseyin ve Ahmed b. Hızır nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ bağ-ı mahdûd-ı mezkûr müteveffâ-yı merkūm Abdülkadir’in mülküdür ile’l-vefât tasarrufunda olup ba‘de vefâtihî oğlu mezbûr Ahmed’e intikāl eylemişdir biz bu husûsa bu vech üzere şâhidleriz şehâdet dahi ederiz deyu herbiri edâ-i şehâdet-i şer‘iyye ettiklerinde gıbbe’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm. Fî gurreti’l-Muharremi’l-harâm li-sene tis‘a ve sittîn ve elf. Şühûdü’l-hâl: Sefer, Mehmed, Hasan, Mahmud, Sefer.