Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 752 Hüküm no: 843 Orijinal metin no: [133a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Mustafa b. Hacı Habil’in Boyacılar çarşısındaki boyacı dükkânına Boyacı Kenan b. Abdullah’ın müdahalesinin men‘i Edirne’de Boyacılar mahallesinde sâkin işbu bâ‘isü’l-kitâb el-Hâc Mustafa b. el-Hâc Hâbil nâm kimesne meclis-i şer‘de zikri âtî dükkâna vâzı‘u’l-yed olduğu şer‘an sâbit olan boyacı tâifesinden Kenan b. Abdullah mahzarında üzerine da‘vâ ve takrîr-i kelâm edip medîne-i merkūmede Boyacılar sûkunda vâki‘ bir tarafı el-Hâc Mehmed mülkü ve bir tarafdan külhan duvarı ve tarafeynden tarîk-ı âm ile mahdûd bir bâb boyacı dükkânı içinde mevcûd bir kazgan ve sâir âlâtı ile gāib ani’l-meclis Ali Bey nâm kimesnenin mülkü olup târih-i kitâbdan dört ay mukaddem zikrolunan dükkânı sâir âlât-ı ma‘lûmesi ile altı bin akçeye bana bey‘ ve teslîm ve ben dahi şirâ’-i sahîh ile iştirâ ve tesellüm ve kabûl eylediğimden sonra semen-i mezbûru târih-i kitâb Şa‘bânı’nın on beşinci gününden üç ay tamâmına değin te’cîl edip ve ben dahi zikrolunan dükkânı ta‘mîr ve meremmet eyleyip mülk ve hakkım iken mezbûr Kenan bî-vech vaz‘-ı yed eder suâl olunup kasr-ı yedine tenbîh olunmak matlûbumdur dedikde gıbbe’s-suâl mezbûr Kenan cevâbında zikrolunan dükkânı içinde mevcûd olan kazgan ve sâir âlâtıyla târih-i kitâbdan dört [ay] mukaddem merkūm Ali Bey bana yedi bin akçeye bey‘ edip ve vech-i muharrer üzere merkūm Ali Bey zikrolunan dükkânı içinde olan kazganı ve sâir âlât-ı ma‘lûmesiyle târih-i kitâbdan mukaddem el-Hâc Mustafa’ye altı bin akçeye bey‘ ve teslîm eylediği ma‘lûmum değildir deyu inkâr ile cevâb edicek müdde‘î-i mezbûrdan müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden Mahmud Efendi b. Eyüb ve Hasan Çelebi b. Rıdvan nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka merkūm Ali Bey târih-i kitâbdan dört ay mukaddem hudûd-ı mezkûr ile mahdûd olan dükkân-ı mezbûru içinde mevcûd olan bir kazgan ve sâir âlât-ı ma‘lûmesi ile bizim huzûrumuzda mezkûr el-Hâc Mustafa’ya altı bin akçeye bey‘ ve teslîm ol dahi iştirâ ve tesellüm ve kabûl eyledikden sonra semenini târih-i mezbûrdan üç ay tamâmına değin te’cîl eyledi biz bu husûsa bu vech üzere şâhidleriz şehâdet dahi ederiz deyu herbiri edâ-i şehâdet-i şer‘ iyye eylediklerinden sonra merkūm Kenan’ın kasr-ı yedine tenbîh birle mâ-vaka‘a bi’t-taleb ketb olundu. Fi’s-sânî min-Zilhicceti’ş-şerîfe [li-sene] semân ve sittîn ve elf. Şühûdü’l-hâl: Mehmed b. Yusuf, Ali b. Behram, Mehmed b. Hasan, el-Hâc İsmail [b.] Bayram, Bayram Beşe, Arslan Beşe ve gayruhüm.