Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 754 Hüküm no: 845 Orijinal metin no: [133b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahudi Yako v. Baruh’un kendisine borcunu ödemesi için Ermeni Avanos’a yüz on sekiz gün süre verdiği Mahmiye-i Edirne’de Firuz Ağa mahallesi sâkinlerinden Avanos v. ( ) nâm Ermeni meclis-i şer‘de Yako v. Baruh nâm Yahudi tarafından meblağ-ı âti’l-beyânı ahz u kabza ve kendiye îsâle ve ahz u kabz ve îsâl mütevakkıf olduğu umûrun mecmû‘una vekîl olup Avram v. David ve Heider v. Aslan nâm Yahudiler şehâdetleriyle şer‘an vekâleti sâbite olan Baryam v. Harun nâm Yahudi mahzarında ikrâr ve takrîr-i kelâm edip müvekkil-i mezbûr Yako’ya elvân-ı mütenevvi‘a çuka bahâsından altı yüz yirmi kıt‘a riyâlî guruş deynim olup meblağ-ı mezbûr mukābilesinde merkūm Yako’ya bir sîm paşa rahtı ve sapı balıkdişi mücevher altın hançer ve bir altın kaplı sobalı sırma kolan kuşak ve bir sapı inci işleme kamçı rehin vaz‘ etmişidim hâlâ zikrolunan rehinlerimi vekîli merkūm Baryam yedinden bi-cümle ahz u kabz edip zikrolunan eşyâyı bezzâzistânda kendim bey‘ edip semeninden müctemi‘ olan dört yüz riyâlî guruşu vekîl-i mezbûr Baryam’a def‘ ü teslîm edip ol dahi ahz u kabz eyledikden sonra meblağ-ı bâkī iki yüz yirmi beş guruşu târih-i kitâbdan yüz on sekiz gün tamâmına değin edâya vekîl-i mezbûr Baryam beni te’cîl eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’s-sâdis mine’l-Muharremi’l-harâm li-sene tis‘a ve sittîn ve elf. Şühûdü’l-hâl: Mehmed Çelebi, Ahmed Çelebi, Arslan Beşe, Bayram Beşe.