Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 767 Hüküm no: 863 Orijinal metin no: [139a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarban Hüseyin’in kaybolduktan sonra İbrahim b. Sinan’ın elinde bulunan atının kendisine iadesi Karışdıran nâm mahalde sârbân tâifesinden Hüseyin b. (…) [nâm] sârbân meclis-i şer‘-i şerîfde râfi‘ü’l-kitâb İbrahim b. Sinan el-cündi mahzarında üzerine da‘vâ ve takrîr-i kelâm edip işbu hâzır bi’l-meclis al iğdiç yorga ve sağ tarafının kıç ayağında kurd zahmı nişânlı olan bârgirimi târih-i kitâbdan on bir ay mukaddem Receb nâm sârbândan medîne-i Filibe’de bin altı yüz elli akçeye iştirâ edip yedimde iken Boğazhisarı’nda mülkümden gāib olmuşidi hâlâ mezbûr İbrahim Bey’in yedinde buldum ahz etmek murâd eylediğimde vermede te‘allül eder suâl olunup bi-hasebi’ş-şer‘ alıverilmek matlûbumdur dedikde gıbbe’s-suâl mezbûr İbrahim Bey târih-i kitâbdan dört ay mukaddem mahrûse-i İstanbul’da Salih ve İbrahim nâm cânbâzlardan bin sekiz yüz doksan akçeye iştirâ eyledim mezbûr Sârbân Hüseyin’in mülkü olduğu ma‘lûmum değildir deyu cevâb vermeğin müdde‘î-i mezbûrun da‘vâsına mutâbık beyyine taleb olundukda yine sârbân tâifesinden udûl-i ricâlden Ahmed b. İvaz ve Osman b. Abdullah nâm kimesneler meclis-i şer‘a li-ecli’ş-şehâde hâzırân olup mârrü’z-zikr iğdiç yorga ve sağ tarafının kıç ayağında nişânı olan bârgir mezbûr Hüseyin’in Receb nâm sârbândan bizim huzûrumuzda bin altı yüz elli akçeye iştirâ edip ba‘dehû Boğazhisarı’nda gāib ettiği bârgirdir biz bu husûsa bu vech üzere şâhidleriz şehâdet dahi ederiz deyu herbiri ba‘de’l-müşâhede edâ-i şehâdet-i şer‘iyye ettikden sonra ba‘de’t-tezkiye şehâdetleri makbûle oldukdan sonra mezbûr Sârbân Hüseyin’e mülkünden turuk-ı şer‘ iyeden bir tarîkle ihrâc etmediğine yemîn teklîf olunup ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcibiyle ba‘de’l-hükm mâ-hüve’l-vâki‘ bi’t-taleb ketb olundu. Tahrîren fî gurreti Saferi’l-hayr li-sene tis‘a ve sittîn ve elf. Şühûdü’l-hâl: Kutb[eddin] İsmail Efendi el-kādî, Ahmed Ağa b. Feridun, Mehmed b. Osman el-cündi, İsmail b. Abdullah el-cündi ve gayruhüm.