Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 766 Hüküm no: 862 Orijinal metin no: [138b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühani Hatun bt. Mustafa Paşa’nın vakfettiği menzilin Ebubekir b. Mehmed Efendi’ye tahsis olunduğu Mahmiye-i Galata muzâfâtından Beşiktaş’da Sinan Paşa mahallesinde sâhil-i bahrde vâki‘ Ümmühani Hâtun bt. Mustafa Paşa’nın vakıf edip vakfiye-i ma‘mûlün-bihâsında mademki hayâtda olan süknâsını kendi nefsine ba‘de vefâtihâ evlâdına ve evlâd-ı evlâdına ba‘de’l-inkırâz ulemâdan meskene muhtâc bir recüle şart ve ta‘yîn eylediği beyne’l-ahâlî ve’l-cîrân ma‘lûmü’l-hudûd menzilde sâkine olan mezbûre Ümmühani Hâtun bilâ-veled fevt olup menzil-i mezbûr mahlûl olmağla ulemâdan işbu sâhibü’l-kitâb umdetü’l-müderrisîni’l-kirâm ve zübdetü’l-muhakkıkīni’l-fihâm Ebûbekir [b.] Mehmed Efendi süknâya eşedd-i ihtiyâc ile muhtâc olmağın menzil-i mezbûr mûmâ-ileyh [Ebûbekir b.] Mehmed Efendi’ye ber-mûceb-i şart-ı vâkıf tevcîh olunup tasarrufi’çün bu vesîka ketb olundu. Fi’r-râbi‘ ve’l-ışrîn min Muharremi’l-harâm li-sene tis‘a ve sittîn ve elf. Şühûdü’l-hâl: Fahrü’l-müderrisîni’l-kirâm Mehmed Efendi b. el-Hâc Hüseyin, Fahrü’l-müderrisîn Mehmed Efendi b. Mustafa, Fahrü’l-kuzât Mustafa Efendi b. İbrahim, Umdetü’l-kuzât Ahmed Şûhî? b. İbrahim Efendi, Fahrü’l-kuzât Abdullah Efendi [b.] Abdulbâki eş-şehîr bi-Damadzâde, Fahrü’l-a‘yân Mustafa Ağa b. Mehmed, Mehmed Çelebi b. Muharrem, Hüseyin Çelebi b. Mehmed, Bayram Beşe b. Mahmud er-râcil ve gayruhüm.