Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 768 Hüküm no: 865 Orijinal metin no: [139a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Amasya Sancağı Mutasarrıfı Osman Paşa’nın Asesbaşı Mahmud Ağa’ya elli bir bin akçe borcu olduğunu ikrar ettiği Ber-vech-i arpalık bi’l-fi‘il Amasya sancağına mutasarrıf olan umdetü’l-ümerâ’i’l-kirâm zübdetü’l-küberâ’i’l-fihâm Osman Paşa hazretleri meclis-i şer‘-i hatîr-i lâzimü’t-tevkīrde mahmiye-i İstanbul’da Çavuş Mescidi kurbünde sâkin Dergâh-ı âlî yeniçerilerine mahsûs olan hücerâtdan elli bir ağa bölüğüne mahsûs odanın çorbacısı ve ordu-yı hümâyûnda hâlâ asesbaşı olan fahrü’l-a‘yân Mahmud Ağa b. ( ) mahzarında bi’t-tav‘i’s-sâf ikrâr ve takrîr-i kelâm edip mûmâ-ileyh Mahmud Ağa’ya zimmetimde cihet-i karzdan otuz iki bin fıddî râyic fi’l-vakt akçe ve semenleri târih-i kitâbdan altı ay tamâmına değin müeccel ve mev‘ûd biri demir kır ve biri eşheb kır bârgir semenlerinden dört bin akçe ve yedinden müşterâ ve makbûz beynimizde ma‘lûm hil‘at semeninden dahi on beş bin akçe ki cem‘an elli bir bin akçe lâzimü’l-edâ ve vâcibü’l-kazâ deynim vardır deyu ikrâr ve i‘tirâf etdikde mukırr-ı müşârun-ileyhi kelimât-ı meşrûhasında el-mukarru lehü’l-mezbûr Mahmud Ağa bi’l-müvâcehe tasdîk ve bi’l-müşâfehe tahkīk etmeğin mâ-vaka‘a bi’t-taleb ketb ve imlâ olundu. Fi’l-yevmi’l-hâmis aşer min-Saferi’l-hayr li-sene tis‘a ve sittîn ve elf. Şühûdü’l-hâl: Receb Beşe b. Abdullah, Ali Beşe b. Abdullah, Kalender Beşe b. Mehmed, Ali Beşe b. ( ) vekîl-i harc, Mehmed Beşe b. Ebîbekir, İbrahim Beşe kapıkethüdâsı.