Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 769 Hüküm no: 866 Orijinal metin no: [139a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. Mahmud’un kira ücretinden merhum Kapıcıbaşı Hasan Ağa zimmetinde kalan elli dört bin akçe alacağının merhumun terekesinden ödenmesi Mahmiye-i İstanbul’da Hüseyin Ağa mahallesi sâkinelerinden işbu bâ‘isetü’l-kitâb fahrü’l-muhadderât Hadice bt. Mahmud nâm hâtun tarafından vech-i âtî üzere da‘vâ ve isbâta ve ityân-ı beyyinâta vekîl olup mahzar-ı hasm-ı câhidde mezbûreyi ma‘rifet-i şer‘iyye ile ârifân olan Zülfikar b. Hüseyin ve Ahmed b. Mehmed şehâdetleri ile şer‘an vekâleti sâbite olan Pîr Mehmed b. Mehmed nâm kimesne meclis-i şer‘-i hatîr-i lâzimü’t-tevkīrde Dergâh-ı âlî kapıcıbaşılarından olup bundan akdem mahalle-i merkūmede müteveffâ olan Hasan Ağa b. Mustafa nâm kimesnenin sulbiye kızı Afîfe nâm sagīrenin vasiyy-i şer‘îsi olan Ali Ağa b. Mehmed nâm kimesne mahzarında bi’l-vekâle da‘vâ ve takrîr-i kelâm edip müvekkile-i mezbûre Hadice Hâtun mahalle-i merkūmede vâki‘ lede’l-ahâlî ve’l-cîrân ma‘lûmü’l-hudûd olup dâhiliye ve hâriciyeyi muhtevî olan mülk menzilini bi-cümleti’t-tevâbi‘ ve’l-levâhık bin altmış beş senesi şehr-i Rebî‘ülâhiri gurresinden dâhiliyesini yevmî yirmi iki akçe ve hâriciyesini dahi yevmî on sekiz akçe icâre-i müeccele ile mezbûr Hasan Ağa’ya hâl-i hayâtında îcâr ve teslîm ol dahi istîcâr ve tesellüm edip menzil-i mezbûr târih-i merkūmdan bin altmış sekiz senesi Zilhiccesi gāyetine gelince mezkûr Hasan Ağa’nın taht-ı icâresinde olmağla zikrolunan şehr-i Rebî‘ülâhiri gurresinden intihâ-i Zilhicce’ye gelince cem‘an kırk beş ayda hesâb-ı mezbûr üzere zimmetinde müctemi‘ olan elli dört bin akçeyi hâl-i hayâtında müvekkile-i mezbûreye def‘ u teslîm [139b] etmeyip zimmetinde kalmağın vekâleti hasebiyle (…) taleb ederim suâl olunsun dedikde gıbbe’s-suâl ve’l-inkâr vekîl-i mezbûrdan sıdk-ı makāline mübeyyine beyyine taleb olundukda udûl-i Müslimînden mahmiye-i merkūmede Nahılbend mahallesi ahâlîsinden Zülfikar b. Hüseyin ve medîne-i Galata nevâhîsinden İstinye nâhiyesinde Yeni nâm karye sükkânından Mehmed Ağa b. Rıdvan nâm kimesneler li-ecli’ş-şehâde meclis-i şer‘a hâzırân olup gıbbe’l-istişhâd fi’l-vâki‘ müvekkile-i mezbûre Hadice Hâtun zikrolunan mülk menzilini bin altmış beş senesi şehr-i Rebî‘ülâhiri gurresinden dâhiliyesini yevmî yirmi iki akçe ve hâriciyesini dahi yevmî on sekiz akçe icâre-i müeccele ile bizim huzûrumuzda mezkûr Hasan Ağa’ya îcâr ve teslîm ol dahi istîcâr ve tesellüm edip menzil-i merkūm târih-i mezbûrdan bin altmış sekiz senesi Zilhiccesi intihâsına gelince mezbûr Hasan Ağa’nın taht-ı icâresinde olduğu ma‘lûmumuzdur biz bu husûsa şâhidleriz şehâdet dahi ederiz deyu edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri ba‘de’t-ta‘dîl ve’t-tezkiye hayyiz-i kabûlde vâkı‘a oldukdan sonra mezbûre Hadice Hâtun zikrolunan elli dört bin akçeyi mezkûr Hasan Ağa’dan hâl-i hayâtında veyâhud vekîlinden küllen ve bazen alıp kabz etmeyip ve vücûh-ı berâ’etden bir vechile zimmetini ibrâ ve ıskāt etmediğine gıbbe’l-istihlâf yemîn billâhi’l-aliyyi’l-azîm etmeğin mûcebince muhallefâtından edâya vasiyy-i mezbûra tenbîh birle mâ-vaka‘a bi’t-taleb ketb ve imlâ olundu. Fi’l-yevmi’s-sâmin min-Saferi’l-hayr li-sene tis‘a ve sittîn ve elf min hicreti men lehü’l-izzü ve’ş-şeref. Şühûdü’l-hâl: Ramazan Bey b. Kurd, Ali Çelebi b. Mehmed, Mehmed Ağa b. Mehmed, Mehmed Çelebi b. Mustafa, Mustafa Çelebi, İbrahim Ağa b. Mehmed.