Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 772 Hüküm no: 870 Orijinal metin no: [140a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rumeli Kadıaskeri Seyyid Mehmed el-Emin Efendi’nin Gürcü asıllı cariyesi Timurhan’ı azat ettiği Bi’l-fi‘il Rumeli kādıaskeri olan a‘lemü’l-ulemâ’i’l-mütebahhirîn efdalü’l-fuzalâ’i’l-müteverri‘în yenbû‘u’l-efâzil câmi‘u’l-fürû ve’l-usûl hâvi’l-ma‘kūl ve’l-menkūl alîmü’l-ilm ve’l-hüdâ menâru’l-fazl ve’t-tukā es-Seyyid Mehmed el-Emin Efendi hazretleri meclis-i şer‘-i şerîf-i şâmihu’l-imâd ve mahfil-i dîn-i münîf-i râsihu’l-evtâdda ikrâr-ı sahîh-i şer‘î ve i‘tirâf-ı sarîh-i mer‘î buyurup zikri âtî i‘tâkın sudûruna değin silk-i mülkümde muntazama ve bana rıkkını mu‘terife açık kaşlı elâ gözlü orta boylu Gürciyyetü’l-asl Müslimetü’l-mille sâhibetü hâze’l-kitâb Timurhan bt. Abdullah nâm câriye-i memlûkemi hasbeten lillâhi’l-aliyyi’l-a‘la’l-[azîm] ve haseneten li-vechi resûlihî’l-kerîm tahrîr ve i‘tâk ve silk-i harâir-i asliyyâta idrâc ve ilhâk eyledim min ba‘d mezbûre Timurhan sâir harâir-i asliyyât gibi hürredir mevâlînin utekāsı üzerlerinde şer‘an sâbit olan hakk-ı velâdan gayrı üzerinde hakkım kalmadı deyu buyurduklarında mâ-hüve’l-vâki‘ bi’t-taleb ketb olundu. Fi’l-yevmi’l-hâmis aşer min şehri Ramazâni’l-mübârek [li-sene] seb‘a ve sittîn ve elf. Şühûdü’l-hâl: es-Sâbıkūn.