Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 51 Hüküm no: 1 Orijinal metin no: [1b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Ümmühani Hatun ile kocası İvaz Çavuş’un muhâlaa yoluyla boşandıkları Mahmiye-i İstanbul’da Efdalzâde Mahallesi’nde sâkine Şerîfe Ümmühani Hatun bt. es-Seyyid Hasan meclis-i şer‘-i şerîfde zevci olan işbu bâ‘isü’l-kitâb İvaz Çavuş b. Mehmed mahzarında ikrâr ve takrîr-i kelâm edip zevcim mezbûr İvaz Çavuş zimmetinde cihet-i karz-ı şer‘îden hakkım olan on beş guruşun on guruşu[nu] yedinden ahz ü kabz eylediğimden sonra bâkī kalan beş guruş ile mütekarrir ve ma‘kūdün-aleyh olan on bin akçe mehr-i müeccelim üzerlerine ve nafaka-i iddet-i ma‘lûmem ve meûnet-i süknâm dahi kendi üzerime olup ve mezbûr İvaz Çavuş’un firâşından hâsıl ve benden mütevellid sadrî sagīr oğlum İsmail teberru‘an kendi mâlımdan yedi yaşına değin infâk ve iksâ etmek üzre zevcim mezbûr İvaz Çavuş ile muhâla‘a-i sahîha-i şer‘iye ile muhâla‘a edip ol dahi hul‘-ı mezbûru kabûl eyledikden sonra hukūk-ı zevciyete ve gayra müte‘allika âmme-i de‘âvî ve muhâsamâtdan her birimiz âharın zimmetini ibrâ ve ıskāt eyledik, min-ba‘d biribirimiz ile asla da‘vâ ve nizâ‘ımız yokdur dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’s-sâmin aşer min-Şevvali’l-mükerrem li-sene tis‘în ve elf. Şuhûdü’l-hâl: Mehmed Efendi b. Ömer el-imâm, Ali Çelebi b. Mustafa, Mustafa Çavuş b. Ramazan, Derviş Çelebi b. Hüseyin.