Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 52 Hüküm no: 2 Orijinal metin no: [1b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bülûğa eren Mehmed b. Mustafa’nın vasîsi Mahmud Çelebi’den parasını teslim aldığı Husûs-ı âti’l-beyânın mahâllinde tahrîri iltimâs olunmağın savb-ı şer‘-i mergūbdan irsâl olunan Mevlânâ Hüseyin Efendi b. Himmet mahmiye-i [İstanbul’da] Beyceğiz Mahallesi’nde sâkin Mahmud Çelebi b. Mehmed nâm kimesnenin menziline varıp zeyl-i kitâbda muharrerü’l-esâmî olan Müslimîn huzûrlarında akd-i meclis-i şer‘-i mübîn eyledikde mahalle-i mezbûre sükkânından olup sinn ve cüssesinin bulûğa tahammülü ve bulûğ ve rüşdünü mu‘terif olan Mehmed b. Mustafa nâm şâbb-ı emred meclis-i ma‘kūd-ı mezbûrda hâl-i sıgārında tesviye-i emrine kıbel-i şer‘den mansûb vasîsi olan işbu bâ‘isü’l-kitâb mezbûr Mahmud Çelebi mahzarında ikrâr ve takrîr-i [2a] kelâm edip mahmiye-i <> mezbûrede Derviş Ali Mahallesi’nde sâkin iken bundan akdem vefât eden babam mezbûr Mustafa’nın hayatında vasîyy-i muhtâr nasb ve ihtiyâr eylediği Osman b. ( ) nâm kimesne babam mezbûr Mustafa’nın vefâtından sonra muhallefâtından benim hisse-i şer‘iyeme isâbet ve intikāl eden yirmi beş bin akçemi vasîyy-i mezbûr Osman ahz ü kabz eylediğinden sonra mezbûr Osman dahi vefât etmekle mezbûr Mahmud Çelebi ber-vech-i muharrer tesviye-i emrim için kıbel-i şer‘den vasî nasb ve ta‘yîn olunmağla mezbûr Osman’ın bi’l-vesâye makbûzu olan meblağ-ı mezbûr yirmi beş bin akçe ile el-Hâc Ahmed nâm kimesne zimmetinde olan yüz beş esedî guruş olmak üzre on iki bin altı yüz akçe ki cem‘an otuz yedi bin altı yüz akçeyi mezbûr Mahmud Çelebi ahz ü kabz ve on sene i‘mâl eylediğinden sonra meblağ-ı mezbûrdan hâsıl olan fâide ile zikrolunan Derviş Ali Mahallesi’nde vâki‘ menzilim icâresinden hâsıl olan akçemi ber-vech-i muharrer mezbûr Mahmu[d] Çelebi yedinde olan iki kıt‘a nafaka hücceti nâtıka olduğu üzre on senede nafaka ve kisvem için ve zikrolunan menzilimin vakıf kirası için harc ü sarf eylediğinden sonra hâlâ mezbûr Mahmud Çelebi’nin yedinde olup asl-ı mâlım olan meblağ-ı mezbûr otuz yedi bin altı yüz akçemi mezbûr Mahmud Çelebi yedinden işbu meclis-i ma‘kūdda tamamen ahz ü kabz eyledim min-ba‘d babam müteveffâ-yı mezbûr Mustafa’nın terekesine müte‘allika kalîl ü kesîr ve celîl ü hakīr ma‘lûme ve mechûle hukūk da‘vâsından mezbûr Mahmud Çelebi’nin zimmetini ibrâ-i âmm-ı kātı‘u’l-hisâm ile ibrâ ve ıskāt eyledim dedikde gıbbe’t-tasdîkı’ş-şer‘î husûs-ı mezbûru mevlânâ-yı mezbûr mahâllinde tahrîr ba‘dehû ma‘an irsâl olunan el-Hâc Abbaszâde Mehmed Çelebi ile meclis-i şer‘a gelip alâ-vukū‘ihî inhâ ve takrîr etmeğin mâ-hüve’l-vâki‘ bi’t-taleb ketb olundu. Fi’l-yevmi’s-sâlis aşer min-Şevvali’l-mükerrem li-sene tis‘în ve elf. Şuhûdü’l-hâl: Ömer Efendi b. el-Hâc Ali, Hüseyin Çelebi b. Süfyan? el-Muhzır, el-Hâc Mehmed b. Abdullah, Abdi Odabaşı b. Mustafa, Ömer Çelebi el-müderris, Berber Mustafa Çelebi b. Abdünnebi, Hasan Dede b. Mehmed, Mehmed Çelebi b. Haydar.