Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 58 Hüküm no: 10 Orijinal metin no: [3b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Borcundan dolayı hapiste olan Musa b. İsa’nın salıverildiği Tüccâr tâifesinden hazır bi’l-meclis el-Hâc Mehmed b. İsa nâm kimesneye ma‘lûmü’l-keyl ol mikdâr pirinç bahâsından altmış iki esedî guruş deyni için dört aydan beri izn-i hâkim ile sicn-i sultânîde habsolunan Musa b. İsa nâm kimesnenin iflâsı sâbit olursa habsden ıtlâk olunmak bâbında buyruldu-i şerîf vârid olmağın mahmiye-i İstanbul’da Tercüman Yunus Mahallesi’nde sâkin mezbûr Musa’dan vech-i âtî üzre istihbâr-ı şer‘î sudûrundan sonra udûl-i Müslimînden olup mahalle-i mezbûre sükkânından Mustafa Beşe b. İsa ve Mehmed b. Ahmed ve Hasan b. Mustafa ve Yahya b. Ebîbekir ve Süleyman b. Sinan ve Mehmed b. Mehmed ve diğer Mehmed b. Osman nâm kimesneler li-ecli’l-ihbâr meclis-i şer‘a hâzırûn olup fi’l-vâki‘ mezbûr el-Hâc Mehmed’in ber-vech-i muharrer altmış iki guruş hakkı için dört aydan beri sicn-i sultânîde habsolunan müstahber-i mezbûr Musa müflis ve mu‘dim ve fakīr olup üzerine lâbis olduğu libâsından gayrı ism-i mâl ıtlâk olunur bir şey’i ve bir habbesi olmayıp ısârı ma‘lûmumuzdur deyü her biri alâ-tarîkı’ş-şehâde mezbûr el-Hâc Mehmed muvâcehesinde haber verdiklerinden sonra medyûn-ı mezbûr Musa’nın nefsine ve hîn-i mutâlebede meclis-i şer‘a ihzârına babası İsa b. Abdülcelil nâm kimesne emir ve kabûlü hâviye kefâlet-i sahîha ile kefîl olmağın kudret ve yesârı zâhir ve sâbit oluncaya değin medyûn-ı mezbûr habsden ıtlâk olunup mâ-vaka‘a bi’t-taleb ketb ü terkīm olundu. Fi’l-yevmi’s-sâlis min-Ramazani’l-mübârek li-sene tis‘în ve elf. Şuhûdü’l-hâl: Ramazan b. Süleyman, Ali Çelebi b. Abdünnebi, Mehmed Çelebi b. Haydar, Mehmed Çelebi b. Eyüb el-mukayyid, Ahmed Çelebi b. Piyale.