Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 58 Hüküm no: 11 Orijinal metin no: [3b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâbık Kestel kadısı İsmail Efendi’nin alacak davasında Kestel ahalisi ile sulh olduğu Vilâyet-i Anadolu’da Kestel kazâsına tâbi‘ Hacıbeyli nâm karyeden Hüseyin b. Ali ve Kavacık nâm karyeden Ali b. el-Hâc Ebîbekir ve Pazarköyü nâm karyeden el-Hâc Ali b. Abdurrahman ve Kenisacık nâm karyeden Hacı Yusuf b. el-Hâc Ebîbekir ve Bardakcıyân nâm karyeden Halil b. Cihan ve Arslan nâm karyeden el-Hâc Hasan b. Mehmed ve Yalıkoyu nâm karyeden İbrahim b. Mehmed nâm kimesneler asâleten ve kazâ-i mezbûr kasabası ahâlîsinden olup kendi tarafından asîl ve kazâ-i mezbûrun ma‘lûmü’l-esâmî ve mahsûrü’l-eşhâs sâir re‘âyâsı taraflarından husûs-ı âti’l-beyâna vekîl olduğu Mehmed b. Mehmed ve es-Seyyid Mustafa Çelebi b. Yusuf nâm kimesneler şehâdetleri ile şer‘an sâbit olan el-Hâc Mehmed b. Mehmed nâm kimesne vekâleten meclis-i şer‘-i şerîf-i lâzımü’t-teşrîfde sâbıkā kazâ-i mezbûre kādısı olan işbu bâ‘isü’l-kitâb Filzâde İsmail Efendi b. Abdurrahman mahzarında her biri ikrâr ve takrîr-i kelâm edip mezbûr İsmail Efendi kazâ-i mezbûr kādısı iken bin seksen dokuz senesi ile bin doksan senesinde bâ-fermân-ı âlî üzerimize edâsı lâzım gelen küçük sürsat teklîfinden re‘âyâ-yı merkūmûndan yüz yirmi beş esedî guruş ve kazâ-i mezbûrun hânesini tenzîl edivermek [için] beş yüz esedî guruş ve Salih Ağa nâm kimesne cem‘ine me’mûr olduğu bedel-i nüzûlden yüz elli esedî guruş cem‘an yedi yüz elli esedî guruşumuzu mezbûr İsmail Efendi bi-gayr-ı hakkın ahz ü kabz ve mesârifine sarfla istihlâk etmekle hâlâ meblağ-ı mecmû‘-ı mezbûr yedi yüz elli esedî guruşu mezbûr İsmail Efendi’den her birimiz da‘vâ ve taleb eylediğimizde ol dahi ikrâr edip lâkin edâda ta‘allül etmekle beynimizde nizâ‘-ı küllî vâki‘ olmuşidi. El-hâletü-hâzihî vesâtet-i muslihîn ile yüz on yedi esedî guruşa mezbûr İsmail Efendi ile sulh olup bedel-i sulh olan meblağ-ı mezbûr yüz on yedi esedî guruşu mezbûr İsmail Efendi yedinden tamamen ahz ü kabz eyledik min-ba‘d husûs-ı mezbûra ve sâir tekâlîfe [4a] müte‘allika kalîl ü kesîr ve celîl ü hakīr hukūk-ı ma‘lûme ve mechûle da‘vâsından mezbûr İsmail Efendi’nin zimmetini ibrâ-yı âmm-ı <> kātı‘u’l-hisâm ile her birimiz ibrâ ve ıskāt eyledik dediklerinde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-işrîn min-Şevvali’l-mükerrem li-sene tis‘în ve elf. Şuhûdü’l-hâl: Eş-şeyh Mehmed Efendi b. el-Kādî bi-Elmalı sâbıkā, Ârif Mehmed Efendi b. el-Kādî bi-Kula sâbıkā, Hüseyin Efendi b. Abdullah, Ömer Efendi b. el-Hâc Mehmed, Mehmed Efendi b. Ataullah.