Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 67 Hüküm no: 22 Orijinal metin no: [6a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kızının vasîsi iken haksız yere azledilen Hatice Hatun bt. İbrahim’in tekrar vasî tayin edildiği Vilâyet-i Rumeli’nde Holomic kazâsına tâbi‘ Gaston kasabası ahâlîsinden olup bundan akdem vefât eden Abdi Bey b. Osman Ağa’nın sulbiye sagīre kızı Fâtıma’nın vâlidesi ve kıbel-i şer‘den mansûbe vasîsi olan işbu bâ‘isetü’l-kitâb Hadîce Hatun bt. İbrahim tarafından husûs-ı âti’l-beyâna vekîl olduğu nehc-i şer‘î üzre sâbit olan li-ebeveyn karındaşı Halil Çelebi nâm kimesne Dîvân-ı Hümâyûn-ı sa‘âdet-makrûnda ma‘kūd meclis-i şer‘-i şerîfde yine kasaba-i mezbûrede sâkine müteveffâ-yı mezbûrun kız karındaşı Âişe nâm hatunun zevci ve tarafından husûs-ı âti’l-beyâna vekîl olduğu nehc-i şer‘î üzre sâbit olan Kürd Ali b. ( ) nâm kimesne mahzarında bi’l-vekâle üzerine da‘vâ ve takrîr-i kelâm edip ber-vech-i muharrer mezbûre Hadîce Hatun’u bin seksen dokuz senesi Saferü’l-hayrının on dördüncü gününde kazâ-i mezbûre kādısı olan es-Seyyid Mehmed Efendi sagīre-i mezbûre için vasî nasb ve ta‘yîn edip yedine hüccet-i şer‘iye verdiğinden sonra müvekkile-i mezbûre dahi vesâyeti hasebiyle müteveffâ-yı mezbûr Abdi Bey’in tasarrufunda olup kasaba-i mezbûre sınırı dâhilinde vâki‘ lede’l-ahâlî ve’l-cîrân ma‘lûmü’l-hudûd çayırları ve Celeb Çiftliği ve Türbe ve Tihor ve Estamroz ve Behruz ve Hüsrev ve Lahana ve Lala ve Kavasla nâm çiftliklerin tarlaları müstahakk-ı tapu olmağla kızı sagīre-i mezbûre için vâlidesi müvekkile-i mezbûre Hadîce Hatun zikrolunan tarlaları tapu-yı misli ile sahib-i arz olanlardan tefevvüz edip hizmet-i vesâyeti kemâ-yenbagī edâ üzre olup vesâyet-i mezbûreden azli îcâb eder hâli olmayıp kat‘a hıyâneti yoğiken mezbûr Kürd Ali Ağa kendi hevâsına tâbi‘ mezbûr es-Seyyid Mehmed Efendi’den sonra kazâ-i mezbûre kādısı olan İbrahim Efendi’den hilâf-ı inhâ bir tarîkle zevcesi müvekkile-i mezbûre Âişe’ye vesâyet hücceti alıp zikrolunan çiftliklerin tarlalarını tekrar sagīre-i mezbûre için zevcesi tarafından vekâleten ben tapuladım deyip fuzûlen zabt ve tasarruf eylediğinden mâ‘adâ müvekkile-i mezbûrenin vesâyetine mâni‘ olmağla hâlâ suâl olunup mûceb-i şer‘îsi icrâ olunmak matlûbumdur dedikde gıbbe’s-suâl mezbûr Kürd Ali Ağa cevâbında kazıyye vekîl-i mezbûr [6b] Halil Çelebi’nin tafsîl etdiği vech üzre olduğunu bi’t-tav‘i’s-sâf ikrâr ve i‘tirâf etmeğin ber-vech-i muharrer müvekkile-i mezbûre Hadice’nin vesâyet-i mezbûrede hıyâneti olmayıp azli îcâb eder hâli olmadığı lede’ş-şer‘i’ş-şerîf zâhir olmağın mûcebince mezbûr Kürd Ali Ağa’nın zevcesi mezbûre Âişe vesâyet-i mezbûreden azl ve zevci vekîl-i mezbûr Kürd Ali Ağa’nın yedinde olan temessükâtları Dîvân-ı Hümâyûn’da şakk olunup zikrolunan ta[r]lalardan minvâl-i muharrer üzre kasr-ı yedine tenbîh olundukdan sonra yine sagīre-i mezbûre için vâlidesi mezbûre Hadîce Hatun’a vesâyet-i mezbûre ibkā olunup mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-işrîn min-Şevvali’l-mükerrem li-sene tis‘în ve elf. Şuhûdü’l-hâl: Umdetü erbâbü’t-tahrîr ve’l-kalem Ali Efendi Tezkire-i ûlâ, zübdetü ashâbi’t-tastîr ve’r-rakām Mustafa Efendi Tezkire-i sâniye, Muhzır Ağa Mehmed Ağa, Çukadâr el-Hâc Mustafa.