Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 66 Hüküm no: 21 Orijinal metin no: [6a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Ağa b. Yusuf’un İbrahim Ağa ile olan rüşvet davasında sulh olduğu Mahmiye-i İstanbul’da Ali Paşa-yı Atîk Mahallesi’nde sâkin olup bin seksen yedi senesinde cezîre-i Kıbrıs bedel-i nüzûlü cem‘ine me’mûr olan Osman Ağa b. Yusuf nâm kimesne meclis-i şer‘-i şerîfde sene-i mezbûrede Kıbrıs mütesellimi olan bâ‘isü’l-kitâb el-Hâc İbrahim Ağa b. el-Hâc Mehmed mahzarında ikrâr ve takrîr-i kelâm edip sene-i mezbûrede cezîre-i mezbûrede bedel-i nüzûl cem‘ine mübâşeret eylediğimde bana mâni‘ olmamak için bi-tarîkı’r-rüşvet dört yüz elli esedî guruş def‘ ve teslîm ol dahi ahz ü kabz ve mesârifine sarfla istihlâk edip hâlâ da‘vâ ve taleb eylediğimde inkâr etmeğin beynimizde münâza‘ât-ı kesîre vukū‘undan sonra muslihûn tavassut edip da‘vâ-yı meşrûhamdan beni üç yüz otuz esedî guruş ile meclis-i sulhde mevcûd ve makbûz bir donluk deve tüyü çuka üzerine inşâ-i akd-i sulh etdiklerinde ben-dahi sulh-i mezbûru kabûl ve bedel-i sulh olan üç yüz otuz esedî guruş ile zikrolunan bir donluk deve tüyü çukayı mezbûr el-Hâc İbrahim yedinden tamamen ahz ü kabz eyledim ba‘de’l-yevm husûs-ı mezbûra müte‘allika da‘vâdan mezbûr el-Hâc İbrahim Ağa’nın zimmetini ibrâ ve ıskāt eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-hâmis ve’l-işrîn min-Şevvali’l-mükerrem li-sene tis‘în ve elf. Şuhûdü’l-hâl: Fahrü’l-akrân Abdülbaki Bey b. ( ), fahr-i a‘yân Mehmed Çavuş el-Mübâşir, Ömer Ağa b. Ahmed Efendi, el-Hâc Ali b. ( ), Selim Çelebi b. ( ), Vasî Ahmed Çelebi b. ( )