Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 69 Hüküm no: 24 Orijinal metin no: [6b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bosnasaraylı Ayşe adlı hatunun hür olduğunun ispatlandığı Vilâyet-i Rumeli’nde Bosnasarayı mahallâtından Kırk Câmi‘i Mahallesi sâkinelerinden olan işbu orta boylu açık kaşlı elâ gözlü Âişe nâm hatun meclis-i şer‘-i hatîrde rıkk olmak üzre kendüye vâzı‘u’l-yed olan Ömer b. Abdullah nâm tâcir mahzarında üzerine da‘vâ ve takrîr-i kelâm edip ben mahalle-i mezbûrda sâkin hürrü’l-asl olan Hüseyin nâm kimesnenin hürretü’l-asl olan zevce-i menkûhası Şerife nâm hatundan mütevellide sulbiye kızı olup asla ebeveynime rıkk târî olmamış iken mezbûr Ömer bana rıkk olmak üzre bi-gayr-ı hakkın vaz‘-ı yed eder suâl olunup kasr-ı yed ve sebîlim tahliye olunması matlûbumdur dedikde gıbbe’s-suâl mezbûr Ömer cevâbında târih-i kitâbdan altmış gün mukaddem vilâyet-i mezbûrede vâki‘ Dolyan Pazarı’nda mevsûfe-i mezbûreyi rıkk olmak üzre Musa nâm kimesneden mecmû‘u yüz altmış guruş kıymetli dört külçe ile üç dâne dühül? ile poni ta‘bîr olunur dülbende iştirâ ve tesellüm ve def‘-i semen etmek ile ona binâen vaz‘-ı yed ederim deyü ber-vech-i mübeyyen mevsûfe-i mezbûrenin hürrü’l-asl olduğunu inkâr edicek müdde‘iyye-i mezbûreden müdde‘âsını mübeyyine beyyine taleb olundukda udûl-i Müslimînden olup fi’l-asl zikrolunan mahalle-i mezbûreden ve hâlâ bi-tarîkı’l-müsâfere mahmiye-i İstanbul’da Bahçekapısı kurbünde sâkin Ömer Bey b. Arslan ve el-Hâc Yusuf b. Osman nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ mevsûfe-i mezbûre Âişe zikrolunan Bosnasarayı mahallâtından Kırk Minâre Mahallesi’nde sâkin hürrü’l-asl olan Hüseyin nâm kimesnenin kezâlik hürretü’l-asl zevce-i menkû[ha]sı Şerife nâm hatundan mütevellide sulbiye kızı olup asla ebeveynine rıkk târî olmayıp hürretü’l-asl olduğuna şâhidleriz şehâdet dahi ederiz deyü her biri edâ-i şehâdet-i şer‘iye etdiklerinde gıbbe’t-ta‘dîl ve’t-tezkiye şehâdetleri makbûle olmağın mûcebince mevsûfe-i mezbûrenin hürriyetine hüküm birle mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-işrîn min-Şevvali’l-mükerrem li-sene tis‘în ve elf. Şuhûdü’l-hâl: Osman Çelebi b. el-Hâc Sefer, Abdurrahman Çelebi b. ( ), Mehmed Çelebi b. el-Hâc Mehmed, İbrahim Çelebi b. el-Hâc Hızır, Şeyh Âmir b. ( ), Hacı Mustafa b. Abdullah.