Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 86 Hüküm no: 44 Orijinal metin no: [11a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kürd Ali Ağa’nın haksız yere el koyduğu Hüseyin Çelebi’ye ait çiftlik ve değirmenden el çekmesi Vilâyet-i Rumeli’nde Hulumiç kazâsına tâbi‘ Gaston kasabası ahâlîsinden olup mahmiye-i İstanbul’da bi-tarîkı’l-müsâfere Molla Aşkī Mahallesi’nde sâkin bâ‘isü hâze’l-kitâb es-Seyyid Hüseyin Çelebi b. Mahmud nâm kimesne meclis-i şer‘-i şerîfde yine kasaba-i mezbûre ahâlîsinden Kürd Ali Ağa b. ( ) nâm kimesne mahzarında üzerine da‘vâ ve takrîr-i kelâm edip kasaba-i mezbûre sınırı dâhilinde vâki‘ lede’l-ahâlî ve’l-cîrân ma‘lûmü’l-hudûd Kukra nâm çiftliğin ve değirmenin bundan akdem dört sehimden bir sehmine mutasarrıf olan kasaba-i mezbûre sükkânından bilâ-veled fevt olan Meremmetçioğlu Seydi bir sehim hissesini tapu ile sahib-i arz bedel-i ma‘lûm mukābelesinde yine kasaba-i mezbûre sükkânından Serdar Mehmed Ağa nâm kimesneye ferâğ ve tefvîz ol dahi tefevvüz ve kabûl eylediğinden sonra bâkī kalan üç sehmin dahi mutasarrıfı olan Şehbaz nâm kimesne dahi hissesini zirâ‘at ve hırâset etmeyip on beş seneden mütecâviz boz ve hâlî bırakıp tapuya müstahak olmağla sipâhisinden tapu-yı misli ile mezbûr Mehmed Ağa üç sehmi dahi tapulayıp zikrolunan çiftliğin cümlesi hakk-ı müfevvazı olup yedi sene zabt ve tasarruf eylediğinden sonra mezbûr Mehmed Ağa dahi zikrolunan çiftliği [ve] değirmeni işbu yedimde olan hüccet-i şer‘iye ve sipâhi temessükü nâtık olduğu üzre iki yüz on riyâlî guruş bedel-i ma‘lûm mukābelesinde bana ferâğ ve tefvîz ben-dahi tefevvüz ve kabûl edip hakk-ı müfevvazım olmuş-iken mezbûr Kürd Ali Ağa zikrolunan çiftliğe bi-gayr-ı hakkın vaz‘-ı yed edip zi[r]â‘at ve hırâset eder suâl olunup kasr-ı yedine tenbîh olunmak matlûbumdur dedikde gıbbe’s-suâl mezbûr Kürd Ali Ağa cevâbında zikrolunan çiftliğin ber-vech-i muharrer üç sehmine mutasarrıf olan mezbûr Şehbaz hâlâ zevce-i menkûham olan Âişe nâm hatun benden mukaddem mezbûr Şehbaz’ın zevcesi olmağla mezbûr Şehbaz zimmetinde mütekarrir ve ma‘kūdün-aleyh olan mehri mukābelesinde zikrolunan üç sehim hissesini ma‘rifet-i sahib-i arz ile mezbûre Âişe’ye ferâğ ve tefvîz ol dahi tefevvüz ve kabûl eylediğinden sonra mezbûre Âişe dahi bana ma‘rifet-i sahib-i arz ile bedel-i ma‘lûm mukā[bele]sinde ferâğ ve tefvîz ben-dahi tefevvüz ve kabûl etmekle ona binâen zabt ve tasarruf ederim deyip vech-i muharrer üzre mezbûr Şehbaz çiftlik-i mezbûrdan hissesini on beş seneden mütecâviz zirâ‘at ve hırâset etmeyip boz ve hâlî bırakıp tapuya müstahak olmağla sahib-i arz tapu-yı misli ile merkūm Mehmed Ağa’ya tapuladığını merkūm Mehmed Ağa ba‘de’t-tapu yedi sene zabt ve tasarruf [ve] zirâ‘at ve hırâset eylediğinden sonra ber-vech-i muharrer çiftlik-i mezbûrun ve değirmenin cümlesini mezbûr es-Seyyid Hüseyin Çelebi’ye ma‘rifet-i sahib-i arz ile bedel-i ma‘lûm mukābelesinde ferâğ ve tefvîz eylediğini inkâr edicek [11b] müdde‘î-i mezbûr es-Seyyid Hüseyin Çelebi’den müdde‘âsını mübeyyine beyyine taleb olundukda udûl-i Müslimînden olup bundan akdem Holomic kādısı olup hâlâ mahmiye-i İstanbul’da Küçük Karaman kurbünde Hoca Hayreddin Mahallesi ahâlîsinden İznikî Ahmed Efendi b. Sinan ve mahalle-i mezbûre ahâlîsinden Yusuf Bey b. Abdullah nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûr Mehmed Ağa zikrolunan çiftliği iki yüz on riyâl[î] guruş bedel-i ma‘lûm mukābelesinde müdde‘î-i mezbûr es-Seyyid Hüseyin Çelebi’ye ma‘rifet-i sahib-i arz ile bizim huzûrumuzda ferâğ ve tefvîz ol dahi tefevvüz ve kabûl eyledi biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye ettiklerinde ba‘de’t-ta‘dîl ve’t-tezkiye şehâdetleri makbûle oldukdan sonra kasaba-i mezbûre ahâlîsinden Dillizâde Yusuf Efendi ve Ömer Hoca b. Ali ve Halil Çelebi b. İbrahim nâm kimesneler dahi meclis-i şer‘a hâzırûn olup zikrolunan çiftlikden hissesini mezbûr Şehbaz on beş seneden mütecâviz boz ve hâlî bırakıp zirâ‘at ve hırâset etmemekle tapuya müstahak oldukda mezbûr Mehmed Ağa dahi tapu-yı misli ile hissesini sahib-i arzdan tapulayıp müdde‘î-i mezbûr Hüseyin Çelebi’ye ferâgat edinceye değin yedi sene zirâ‘at ve hırâset etmişidi deyü her biri alâ-tarîkı’ş-şehâde mezbûr Kürd Ali Ağa muvâcehesinde haber vermeğin mûcebince zikrolunan çiftlikden ve değirmenden kasr-ı yed etmek üzre mezbûr Kürd Ali Ağa’ya tenbîh birle mâ-vaka‘a bi’t-taleb ketb olundu. Fi’l-yevmi’l-hâmis min-Zilka‘deti’ş-şerîfe li-sene tis‘în ve elf. Şuhûdü’l-hâl: Fahrü’l-kuzât Hasan?-zâde Hüseyin Efendi, Şehbazzâde Ahmed Bey b. Mehmed, Veli Çavuş b. ( ), Mehmed Ağa Kethudâ-yı Hazret-i Efendi, Ahmed Efendi b. ( ), Ali Efendi b. ( ), Baderorlı Yusuf Ağa, Mustafa Bey b. Şehbaz, Mehmed Çelebi b. Haydar, fahrü’l-kuzât Emrullah Efendi, İvaz Beşe b. ( ), Veli Çavuş b. ( ), Hasan Kethudâ tâbi‘-i Emrullah Efendi.