Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 85 Hüküm no: 43 Orijinal metin no: [11a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mehmed Ağa b. Süleyman’ın kızı Rabia’ya Mehmed Efendi b. Ali Çavuş’un vasî tayin edildiği Mahmiye-i İstanbul’da Kızıltaş Mahallesi ahâlîsinden olup bundan akdem Uyvar kal‘ası muhâfazasında iken vefât eden Dergâh-ı âlî yeniçerileri çorbacılarından Mehmed Ağa b. Süleyman’ın sulbiye sagīre kızı Râbia’nın tesviye-i umûruna kıbel-i şer‘den mansûb vasîsi olan Mehmed Ağa b. Sinan ehl-i hizmetten olup üzerinde mal-ı iltizâm olduğundan mâ‘adâ âhar diyâra sefer iktizâ etmekle sagīre-i mezbûrenin mâlı telef olmak zâhir ve mukarrer olmağın mezbûr Mehmed Ağa vesâyet-i mezbûreden azl ve ref‘ olunup yerine ahâlî-i mahalle-i mezbûreden olup her vechile müstakīm ve mütedeyyin ve perhizkâr ve vesâyet uhdesinden gelmeğe kemâ-yenbagī kādir olduğu zeyl-i rakīmde muharrerü’l-esâmî Müslimîn ihbârlarıyla müstahak olan Dîvân kâtiblerinden işbu râfi‘u’l-vesîka Mehmed Efendi b. Ali Çavuş sagīre-i mezbûrenin emvâlini hıfza ve ahvâlini zabta kıbel-i şer‘den vasî nasb ve ta‘yîn olundukda ol dahi vesâyet-i mezbûreyi kabûl ve merâsimini edâya ta‘ahhüd etmeğin mâ-vaka‘a bi’t-taleb [ketb] olundu. Fi’l-yevmi’s-sânî aşer min-Zilka‘deti’ş-şerîfe li-sene tis‘în ve elf. Şuhûdü’l-hâl: es-Sâbıkūn.