Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 88 Hüküm no: 46 Orijinal metin no: [11b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Âdile bt. Mahmud’un eşi Hasan b. Abdullah’tan muhâlaa yoluyla boşandıktan sonra her ikisinin de birbirlerinin zimmetlerini ibra ettikleri Kasaba-i Varna sâkinelerinden Âdile bt. Mahmud nâm hatun tarafından husûs-ı âti’l-beyâna vekîl olduğu mezbûrenin zâtını ma‘rifet-i şer‘iye ile ârifân Es‘ad Efendi b. Mirza ve İsmail Efendi b. Mehmed şehâdetleriyle şer‘an sâbit olan ammisi Mehmed Çelebi b. Yusuf meclis-i şer‘-i hatîr-i lâzımü’t-tekrîmde müvekkile-i mezbûrenin zevci Hasan b. Abdullah nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûre Âdile’nin zevci merkūm Hasan zimmetinde mütekarrir ve ma‘kūdün-aleyh olan dört bin akçe mehr-i müeccelinden ve nafaka-i iddet-i mu‘ayyenesinden vekâletim hasebiyle fâriğ olup meûnet-i süknâsı dahi kendi üzerine olmak üzre zevci mezbûr Hasan ile muhâla‘a-i sahîha-i şer‘iye ile muhâla‘a eylediğimde ol dahi hul‘-ı mezbûru kabûl eylediğinden sonra hîn-i izdivâclarından müvekkilem mezbûrenin beher yevm onar akçe nafaka-i mefrûzasından on altı ayda müctemi‘ olan dört bin sekiz yüz akçenin bin sekiz yüz akçesini bi’l-vekâle mezbûr Hasan yedinden ahz ü kabz eyleyip bâkī üç bin akçeye ve sâir hukūk-ı zevciyete müte‘allika âmme-i de‘âvî ve mutâlebâtdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’[12a]r-râbi‘ aşer min-Zilka‘deti’ş-şerîfe li-sene tis‘în ve elf. Şuhûdü’l-hâl: Ahmed Efendi b. Derviş, Rasûl Ağa b. ( ), Abdullah Efendi b. Ali, Mehmed Efendi b. Piyale, Hidayet Çelebi b. Mehmed.