Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 88 Hüküm no: 47 Orijinal metin no: [12a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Müezzin Mehmed Çavuş’un mirasından yeğeni olduğu anlaşılan Mehmed Bey’in de pay alması Bi’l-fi‘il medîne-i Manisa kādısı olan umdetü’l-mevâli’l-izâm Hâcibzâde Mehmed b. Mustafa b. Mahmud kıbelinden imzâsıyla mümzâ ve hatmi ile mahtûm ve bin doksan senesi Şevval’inin on altıncı günü ile müverrah nakl-i şer‘î vârid olup mazmûnu medîne-i İzmir kurbünde vâki‘ Sancakburnu nâm mahâlde olan kal‘a-i cedîd neferâtından Mehmed Bey b. Mehmed Bey nâm kimesneden vech-i âtî üzre da‘vâ-yı sahîha-i şer‘iye ile mesbûk istişhâd-ı şer‘î sudûrundan sonra udûl-i ahrâr-ı Müslimînden olup medîne-i Manisa mahallâtından Bölücek-i Cedîd Mahallesi’nden Saka Mustafa b. Ali b. Ahmed ve el-Hâc Nasuh b. Yusuf ve Sarrâc Mehmed Çelebi b. Süleyman b. Abdullah ve Bektaş Bekir Mahallesi’nden Hüseyin b. Mehmed b. Hüseyin nâm kimesneler nakl ve tahvîl için mahâll-i cerh ve ta‘dîle li-ecli’ş-şehâde hâzırûn olup Dârü’s-saltanati’s-seniyye Kostantıniyye el-mahmiye’de Ma‘cuncu Çarşısı’na karîb Mollagürânî Mahallesi’nde sâkin iken bundan akdem fevt olan Müezzin Mehmed Çavuş b. Hamza Beşe müsteşhid-i mezbûr Mehmed Bey’in babası merkūm Mehmed Bey ile li-ebeveyn karındaşlar olup babaları ismi Osman ve cedleri ismi Abdullah ve vâlideleri ismi Havva ve maskat-ı re’sleri Vilâyet-i Rumeli’nde vâki‘ Kanlıcak Sancağı’dır, müteveffâ-yı mezbûr Müezzin Mehmed Çavuş’un verâseti sulbiye kebîre kızı Havva nâm hatun ile usûbet-i nesebiye cihetinden mezbûr Mehmed Bey’e münhasıradır ve mezbûrândan gayrı vârisi ve terekesine müstahakk-ı âhar olduğu ma‘lûmumuz değildir müsteşhid-i mezbûr için cümle terekesine vâzı‘atü’l-yed olan mezbûre Havva’dan hisse-i şer‘iyesini hakk-ı taleb ve ahz vardır biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye etdiklerinde ba‘de’t-ta‘dîl ve’t-tezkiye şehâdetleri makbûle olmağın kitâb-ı mezbûr tereke-i müteveffâ-yı mezbûra vâzı‘atü’l-yed olan kızı mezbûre Havva muvâcehesinde feth ve kırâet ve istintâk olundukda mezbûre Havva tereke-i müteveffâ-yı mezbûra vaz‘-ı yedini ikrâr lâkin kitâb-ı mesfûrun mevlânâ-yı mezbûr kıbelinden vürûdunu inkâr edicek mezbûr Mehmed Bey’den husûs-ı mezbûra beyyine taleb olundukda udûl-i Müslimînden olup kitâb-ı mezbûrun zeylinde isimleri mastûr olan şühûd-ı tarîkden Mustafa Beşe b. Ali ve Ömer Beşe b. Mehmed nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka kitâb-ı merkūm mevlânâ-yı mezkûr Hâcibzâde Mehmed Efendi kıbelinden vârid olup kitâb-ı mezbûru bizim huzûrumuzda imzâ ve hatm edip bizi işhâd eyledi kitâb-ı mezbûrun zeylinde olan hat ve zahrında olan hatm mevlânâ-yı mezbûrun kendi hat ve hatmidir biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm ve’t-tenbîh mâ-hüve’l-vâki‘ bi’t-taleb ketb olundu. Fi’l-yevmi’l-hâmis aşer min-Zilka‘deti’ş-şerîfe li-sene tis‘în ve elf. Şuhûdü’l-hâl: el-Hâc Yusuf b. Abdullah, el-Hâc Mustafa Çukadâr, Ali Çelebi b. Abdullah, Mehmed Çelebi b. Haydar.