Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 97 Hüküm no: 57 Orijinal metin no: [14b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kâtibe bt. Abdullah adlı cariye ile oğlu Yusuf’un azat edildiklerinin ispat edildiği Husûs-ı âti’t-takrîr mahâllinde tahrîr iltimâs olunmağın savb-ı şer‘den ba‘s olunan Mevlânâ Abdullah Efendi mahmiye-i İstanbul’da Unkapanı kurbünde Hoca Halil Mahallesi’nde Mehmed Efendi b. Ali’nin sâkin olduğu menziline varıp zeyl-i kitâbda isimleri terkīm olunan Müslimîn huzûrlarında akd-i meclis-i şer‘-i hatîr etdikde mahalle-i mezbûrede sâkine iken bundan akdem vefât eden Fâtıma Hatun bt. Abdullah’ın zâhirde zevc-i metrûkü mezbûr Mehmed Efendi’den gayrı vârisi mevcûd olmamak ile muhallefâtının nısfı mezbûr Mehmed Efendi’ye ve nısf-ı âharı cânib-i mîrîye âid oldukdan sonra bundan akdem rıkka inkıyâdı zâhir olup orta boylu açık kaşlı sarı (...) gözlü Rusiyyetü’l-asl Müslimetü’l-mille hâmiletü’l-kitâb Kâtibe bt. Abdullah meclis-i ma‘kūd-ı mezbûrda mezbûr Mehmed Efendi ile mahmiye-i mezbûrede beytü’l-mâli’l-hâs emîni olup terekenin nısf-ı âharına bi-hasebi’l-emâne vâzı‘u’l-yed olan Ömer Ağa b. Osman mahzarlarında üzerlerine da‘vâ ve takrîr-i kelâm edip ben müteveffât-ı mezbûrenin câriye-i memlûkesi ve sagīr oğlum işbu hazır bi’l-meclis Yusuf b. Abdullah abd-i memlûkü olup lâkin hâl-i sıhhatinde târih-i kitâbdan on beş gün mukaddem beni ve oğlum sagīr-i mezbûr Yusuf’u hasbeten lillâhi te‘âlâ mâlından âzad ve mülkünden [ihrâc] etmekle ben ve oğlum sagīr-i mezbûr hür ve hürre olmuş-iken mezbûreyne rıkk olmak üzre vaz‘-ı yed ederler suâl olunup kasr-ı yedlerine tenbîh olunmak matlûbumdur dedikde gıbbe’s-suâl ve’l-inkâr müdde‘iyye-i mezbûreden sıdk-ı makāline beyyine taleb olundukda udûl-i ahrâr-ı ricâlden olup mahalle-i mezbûrede sâkin el-Hâc Musa b. Mehmed ve el-Hâc Hüseyin b. Halil ve Ramazan Beşe b. Mehmed li-ecli’ş-şehâde meclis-i ma‘kūd-ı mezbûra hâzırûn olup istişhâd olunduklarında fi’l-hakīka müteveffât-ı mezbûre Fâtıma Hatun hâl-i sıhhatinde târih-i kitâbdan on beş gün mukaddem bizim huzûrumuzda evsâf-ı mezbûre ile mevsûfe câriye-i memlûkesi mezbûre Kâtibe ile abd-i memlûkü mezbûr Yusuf’u mâlından âzad ve mülkünden ihrâc eyledi biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle oldukdan sonra vâki‘ hâli mevlânâ-yı mezbûr mahâllinde istimâ‘ ve tahrîr ba‘dehû meclis-i şer‘a gelip alâ-vukū‘ihî inbâ-i tahkīk etdikden sonra mûcebiyle ba‘de’l-hükm mâ-vaka‘a bi’t-taleb ketb olundu. Tahrîren fî 17 min-Zilka‘de li-sene 1090. Şuhûdü’l-hâl: Mustafa Efendi b. Sinan el-imâm, Ahmed Efendi b. ( ) el-müezzin, el-Hâc Ali Çelebi b. İbrahim, Mahmud Efendi b. Mustafa, Hasan Efendi b. Üveys, el-Hâc Ramazan b. Musa, Osman Beşe b. Ali, Ali Çavuş b. Abdullah, Mehmed Çelebi b. Mahmud.