Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 96 Hüküm no: 56 Orijinal metin no: [14a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Ahmed Ağa’nın kocasının terekesinden kendisine isabet eden parayı kızına vasî tayin edilen kişiden teslim aldığı Mahmiye-i İstanbul’da Akbıyık Mahallesi ahâlîsinden olup bundan akdem medîne-i Kilis’de vefât eden Receb Ağa b. ( ) nâm müteveffânın zevce-i metrûkesi Emine bt. Ahmed Ağa nâm hatun meclis-i şer‘-i hatîr-i lâzımü’t-teşrîfde sulbiye sagīre kızı Ümmühani’nin tesviye-i umûruna kıbel-i şer‘den mansûb vasîsi olan işbu râfi‘u’l-kitâb Abdülvehhab Çelebi b. el-Hâc Abdi nâm kimesne mahzarında ikrâr ve takrîr-i kelâm edip müteveffâ-yı mezbûr Receb Ağa’nın mahmiye-i mezbûrede mevcûd bulunan ber-mûceb-i defter-i kassâm terekesinden bi’l-irsi’ş-şer‘î sümün hisse-i şer‘iyeme isâbet eden yedi bin iki yüz kırk bir akçe ve medîne-i Kilis’den gelen nukūd-ı terekesinden kezâlik bana isâbet eden on sekiz bin yüz yirmi akçe ve mehr-i müeccelim olan on sekiz bin akçe ki min-haysü’l-mecmû‘ kırk üç bin üç yüz altmış bir akçeyi vasîyy-i mezbûr Abdülvehhab Çelebi yedinden bi’t-tamam ve’l-kemâl ahz ü tesellüm ü kabz eyledim meblağ-ı mezbûrdan yedinde [ve] zimmetinde bir akçe ve bir habbe kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis ve’l-işrîn min-Şevvali’l-mükerrem li-sene tis‘în ve elf. Şuhûdü’l-hâl: el-Hâc Ahmed Çavuş b. ( ), Osman Efendi b. ( ) el-kâtib, Mahmud Çelebi Mukayyid, Ahmed Çelebi b. Piyale.