Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 98 Hüküm no: 59 Orijinal metin no: [14b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Firuze bt. Abdullah’ın müdebber cariyesi Şehbaz bt. Abdullah’a muhallefatından verilmek üzere bazı eşyalar vasiyet ettiği Mahmiye-i İstanbul’da Ali Paşa-yı Atîk Mahallesi’nde sâkine Fîrûze bt. Abdullah nâm hatun meclis-i şer‘-i hatîr-i lâzımü’t-tevkīrde vasiyyet-i âti’l-beyânı tenfîze vasîyy-i muhtâr eylediği işbu bâ‘isü’l-kitâb Feyzullah Çavuş b. Mehmed mahzarında ikrâr ve takrîr-i kelâm edip küllü nefsin zâikatü’l-mevt ve küllü hayyin mülâkīhi’l-fevt fehvâsınca bi-emrillâhi te‘âlâ ben kazâ-i nahb ve likā-i Rabb etmezden kırk gün mukaddem mâlımdan âzad olmak üzre müdebberem olan Şehbaz bt. Abdullah’a muhallefâtımdan bir sîm kabara kuşa[k] ve bir sîm ön kuşak ve dört kadife yasdık ve üç köhne beledî yasdık ve dört köhne minder ve iki beledî döşek ve beş yemenî yorgan ve dört köhne kırmızı velence ve bir mâ‘i velence ve dört kebe ve bir orta keçesi ve dört tencere ve üç tâbe ve üç güğüm ve altı sahan ve iki hoşâb tası ve bir hamam tası ve bir bakraç ve bir köhne dîbâ anteri ve bir tabaka? kaftan ve bir kızıl çubuk zenne çuka ferâce ve bir köhne kırmızı çuka (...) zerdevâ kürk ve bir munakkaş çârşeb ve iki beyâz çârşeb ve bir peşkir ve iki şamdân ve iki bakır tebsi ve iki munakkaş bohça ve bir iki leğen ve bir ibrik ve iki köhne ayaklı sandığımı vefâtımdan sonra mezbûre Şehbaz’a verile deyü [15a] vasiyyet edip vasiyyet-i merkūmeyi ber-vech-i muharrer tenfîze mezbûr Feyzullah Çavuş’u vasîyy-i muhtâr nasb ve ihtiyâr eyledim dedikde mezbûr Feyzullah Çavuş dahi vesâyet-i merkūmeyi kabûl ve vech-i muharrer üzre hizmet-i lâzımesin edâya ta‘ahhüd etmeğin mâ-vaka‘a bi’t-taleb ketb olundu. Fi’l-yevmi’l-hâmis ve’l-işrîn min-Zilka‘deti’ş-şerîfe li-sene tis‘în ve elf. Şuhûdü’l-hâl: Zeynelabidin Efendi el-imâm, Yusuf Halîfe el-müezzin, Mehmed Çelebi b. Ali, Mehmed Çelebi b. İbrahim, Kenan Bey b. Abdullah, Süleyman Bey Bostânî.