Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 99 Hüküm no: 60 Orijinal metin no: [15a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdülkadir Çelebi b. Hasan üzerine küçük çocuğu İsmail için nafaka takdir edildiği Mahmiye-i İstanbul’da Edirnekapısı dâhilinde Kara (...) [Mustafa] Paşa odalarının birinde sâkine Havva bt. Bayram nâm hatun meclis-i şer‘-i hatîr-i lâzımü’t-tevkīrde takrîr-i kelâm edip zevc-i mutallıkım olup hazır bi’l-meclis Abdülkadir Çelebi b. Hasan’ın firâşından hâsıl ve benden mütevellid ve hâlâ hacr ve terbiyemde olan İsmail nâm sagīrin nafaka ve kisve ve sâir havâyic-i lâzımesi için kadr-ı ma‘rûf yevmî akçe nafaka farz ve takdîr olunması matlûbumdur dedikde hâkim-i muvakki‘-i sadr-ı kitâb -tûbâ-lehû ve hüsnü-meâb- hazretleri dahi sagīr-i mezbûrun nafaka ve kisve ve sâir havâyic-i lâzımesi için babası mezbûr Abdülkadir Çelebi üzerine yevmî dörder akçe takdîr edip meblağ-ı mefrûz-ı mezkûru vech-i muharrer üzre sagīr-i mezbûrun nafaka ve kisve ve sâir levâzım-ı mühimmesine harc ü sarfa ve vakt-i zarûretde istidâneye ve lede’z-zafer mezbûr Abdülkadir Çelebi üzerine rücû‘a mezbûre Havva’ya izin verilip mâ-hüve’l-vâki‘ bi’t-taleb ketb olundu. Fi’l-yevmi’l-hâmis ve’l-işrîn min-Zilka‘deti’ş-şerîfe li-sene tis‘în ve elf. Şuhûdü’l-hâl: Abdullah Çelebi b. Mustafa, Mustafa Çelebi Berber, Mehmed Beşe b. Hasan, Mehmed Çelebi b. Cafer, Mehmed Çelebi b. Haydar, Ahmed Çelebi b. Piyale.