Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 110 Hüküm no: 69 Orijinal metin no: [18b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yeniçerilerin kırk altıncı cemaatine mahsus para vakfının mütevellisi Hasan Çelebi’nin vakıf gelirlerine dair selefine yönelttiği suçlamaların reddedildiği Dergâh-ı âlî -dâme mahfûfen bi’l-meâli- yeniçerilerinden kırk altıncı cemâ‘ate mahsûs oda neferâtının mühimmâtına mevkūfe nukūda bi’l-fi‘il mütevellî olan Hasan Çelebi b. Abdullah nâm kimesne meclis-i şer‘-i şerîfde vakf-ı mezbûrun sâbıkā mütevellîsi olan işbu râfi‘u’l-kitâb el-Hâc Osman b. Mustafa mahzarında bi’t-tevliye üzerine da‘vâ ve takrîr-i kelâm edip mezbûr el-Hâc Osman bin seksen üç senesi Muharremi’l-harâmında vakf-ı mezbûra mütevellî oldukda altı bin dört yüz altmış dokuz esedî guruş zimem ve iki yüz yetmiş sekiz guruş nakid ki cem‘an altı bin yedi yüz kırk yedi guruş ahz ü kabz edip bin seksen yedi senesi Muharremine gelince dört senede istirbâh ve istiğlâl eylediğinden sonra mezbûr el-Hâc Osman dahi tevliyet-i mezbûreden azlolunmağın yedimizde olan muhâsebe defteri nâtık olduğu üzre ber-vech-i muharrer makbûzu olan asl-ı mal-ı vakfından altı bin beş yüz otuz esedî guruşunu ma‘lûmü’l-esâmî ve’l-eşhâs zimemden bana havâle edip ve iki yüz on yedi guruşunu nakid cem‘an altı bin yedi yüz kırk yedi guruş asl-ı mâl ve zikri mürûr eden dört senede hâsıl olan rıbh-ı şer‘îden dahi bin dört yüz doksan yedi guruş ki min-haysü’l-mecmû‘ sekiz bin iki yüz kırk dört esedî guruşunu bana def‘ ü teslîm ben-dahi tevliyetim hasebiyle bi’t-tamam ve’l-kemâl ahz ü kabz eylediğimden sonra sinîn-i merkūmede hâsıl olan rey‘ ve rıbhından makbûzum olan meblağ-ı mezbûr bin dört yüz doksan yedi guruşdan mâ‘adâsını mezbûr el-Hâc Osman ketm ve ihfâ ve mesârifine sarf ve istihlâk etmeğin hâlâ taleb eylediğimde edâdan imtinâ‘ eder suâl olunup ihkāk-ı hak olunmak matlûbumdur dedikde gıbbe’s-suâl ve akībe’l-inkâr müdde‘î-i mezbûr Hasan Çelebi’den sıdk-ı makāline beyyine taleb olundukda ityân-ı beyyineden izhâr-ı acz edip istihlâf etmeğin fi’l-hakīka mal-ı vakf-ı mezbûrun murâbahasından bir şey’ini ketm ü ihfâ etmeyip kendü mesârifine sarf ü istihlâk etmediğine mezbûr el-Hâc Osman’a yemîn teklîf olundukda ol dahi hasbe’l-mesûl yemîn billâhi’l-aliyyü’l-a‘lâ etmeğin mûcebince mütevellî-i mezbûr Hasan Çelebi bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-işrîn min-Zilka‘deti’ş-şerîfe li-sene tis‘în ve elf. Şuhûdü’l-hâl: es-Sâbıkūn.