Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 110 Hüküm no: 70 Orijinal metin no: [18b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Efendi b. Halil’in vefat eden Mehmed Çelebi’deki alacağını varisinden tahsil etmesi Fi’l-asl Vilâyet-i Anadolu’da kasaba-i Ezine ahâlîsinden olup sâbıkā Torlu kādısı olan işbu râfi‘u’l-kitâb Ali Efendi b. Halil meclis-i şer‘-i hatîrde mahmiye-i İstanbul’da Kirmasti Mahallesi’nde sâkin iken bundan akdem vefât eden Mehmed Çelebi b. İbrahim’in ammi oğlu ve hasren vârisi olmağla terekesine vâzı‘u’l-yed olan Osman Efendi b. Ömer Efendi nâm kimesne mahzarında üzerine da‘vâ ve takrîr-i kelâm edip müteveffâ-yı mezbûr Mehmed Çelebi zimmetinde cihet-i karz-ı şer‘îden iki yüz esedî guruş hakkım olup hatta cihet-i mezbûreden bana iki yüz esedî guruş lâzımü’l-edâ <> deyni olduğunu şuhûd mahzarında hayatında ikrâr ve işhâd eylediğinden sonra kable’l-istifâ vefât etmeğin (...) [hâlâ] tereke-i vâfiyesinden taleb ederim suâl olunsun dedikde gıbbe’s-suâl mezbûr Osman Efendi cevâbında tereke-i müteveffâ-yı mezbûra vaz‘-ı yedini ikrâr lâkin deyn-i mezbûru inkâr edicek müdde‘î-i mezbûr Ali Efendi’den müdde‘âsını mübeyyine beyyine taleb olundukda udûl-i Müslimînden olup Satılmış kazası ahâlîsinden Mustafa Efendi b. İbrahim ve Çöregi kazâsı sükkânından Mehmed Efendi b. Abbas nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr Mehmed Çelebi hayatında müdde‘î-i mezbûr Ali Efendi’ye cihet-i karz-ı şer‘îden iki yüz kıt‘a esedî guruş lâzımü’l-edâ ve vâcibü’l-kazâ deynim vardır deyü bizim huzûrumuzda ikrâr ve bizi işhâd eyledi biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebince ba‘de’l-hükm ve’t-tenbîh mâ-vaka‘a bi’t-taleb ketb olundu. Fi’l-yevmi’s-sâdis min-Zilhicceti’ş-şerîfe li-sene tis‘în ve elf. Şuhûdü’l-hâl: Hüseyin Efendi b. Şa‘ban, Ahmed Efendi b. Celil, Mehmed Efendi b. Mustafa Efendi, Mehmed Çelebi b. Haydar ve gayruhum.