Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 121 Hüküm no: 80 Orijinal metin no: [21b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Küçük yaşta vefat eden Abdurrahman adlı çocuğun vasîsi Mehmed Ağa’daki parasının varislerine teslim edildiği Mahmiye-i İstanbul’da Nahılbend Mahallesi’nde sâkin iken bundan akdem vefât eden Abdurrahman b. Sarı Zülüflü Mehmed Efendi nâm sagīrin verâseti vâlidesi Hidayetullah bt. Abdullah ile li-üm er karındaşı Halil’e ve kız karındaşı Âişe nâm sagīrelere münhasıra olduğu şer‘an sâbit ve zâhir oldukdan sonra mezbûr[e] Hidayetullah asâleten ve sagīrân-ı mezbûrânın babaları ve velîleri olan Mehmed Ağa b. Abdülmennan nâm kimesne velâyeten meclis-i şer‘-i hatîr-i lâzımü’t-tevkīrde sagīr-i mezbûr Abdurrahman’ın hayatında tesviye-i emrine kıbel-i şer‘den mansûb vasîsi olan fahrü’l-akrân bâ‘isü hâze’l-kitâb el-Hâc Mehmed Ağa b. Ahmed Efendi nâm kimesne mahzarında her biri ikrâr ve takrîr-i kelâm edip mûmâ-ileyh el-Hâc Mehmed Ağa ber-vech-i muharrer sagīr-i merkūm Abdurrahman’ın hayatında vasîsi olmağla babası mezbûr Sarı Zülüflü Mehmed Efendi oğlu mezbûr Abdurrahman’a hayatında hîbe ve teslîm eylediği iki bin esedî guruşu ve mecmû‘ yedi bin otuz beş akçeye mukavvem kitâbını işbu defter nâtık olduğu üzre mezbûr el-Hâc Mehmed Ağa bi’l-vesâye ahz ü kabz eylediğinden sonra mezbûr el-Hâc Mehmed Ağa sagīr-i mezbûrun vefâtına gelince beş sene vasîsi olup meblağ-ı mezbûru üç sene i‘mâl etmeyip iki sene dahi ancak bin beş yüz esedî guruşunu i‘mâl edip iki senede hâsıl olan üç yüz on beş guruş rıbh-ı şer‘îsi ile cem‘an iki bin üç yüz on beş esedî guruşun ma‘lûmü’l-mikdârını sagīr-i mezbûr Abdurrahman’ın beş sene nafaka-i mefrûza ve sâir levâzım-ı zarûriyesine harc ve sarf eylediğinden sonra bakī kalıp adedi beynimizde ma‘lûm meblağ ile mârrü’z-zikr kitâbı mezbûr el-Hâc Mehmed Ağa yedinden tamamen ahz ü kabz eyledik min-ba‘d meblağ-ı [me]cmû‘-ı mezbûr ile mârrü’z-zikr kitâblardan mezbûr el-Hâc Mehmed Ağa yedinde ve zimmetinde bir akçe ve bir habbemiz kalmayıp meblağ-ı mezbûr ile zikrolunan kitâblara müte‘allika âmme-i de‘âvî ve mutâlebât ve eymân [ve] muhâsamâtdan her birimiz mezbûr el-Hâc Mehmed Ağa’nın zimmetini ibrâ-i âmm-ı kātı‘u’l-hisâm ve râfi‘u’n-nizâ‘la ibrâ ve ıskāt eyledik dediklerinde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâmin aşer min-Zilka‘deti’ş-şerîfe li-sene tis‘în ve elf. Şuhûdü’l-hâl: Fahrü’l-müderrisîni’l-kirâm Yüsrî Ahmed Efendi, fahrü’l-kuzât Ahmed Efendi b. Süleyman, el-Hâc Ahmed Ağa b. Osman, Mustafa Efendi b. Mehmed, Ahmed Çavuş b. ( ), el-Hâc Ahmed Çavuş b. İsa, Hasan Çavuş b. Ali.