Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 120 Hüküm no: 79 Orijinal metin no: [21b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Çelebi b. Mehmed’in vefat eden İnayetullah Efendi’nin varisi olduğunu ispatladığı Husûs-ı âti’t-takrîr mahâllinde tahrîr iltimâs olunmağın kıbel-i şer‘den ba‘s olunan Mevlânâ Abdullah Efendi b. Mehmed mahmiye-i İstanbul’da Bezzâzistân-ı Atîk kurbünde beytü’l-mâli’l-hâs emînlere mahsûsa odaya varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i hatîr ettikde mahmiye-i mezbûrede Emir Sinan Mahallesi’nde sâkin Abdullah Çelebi b. el-Hâc Mehmed meclis-i ma‘kūd-ı mezbûrda mahmiye-i mezbûrede beytü’l-mâl-i hâs emîni olup mahalle-i mezbûrede sâkin iken bundan akdem vefât eden İnâyetullah Efendi b. İnâyetullah’ın zâhirde vâris-i ma‘rûfu olmamak zu‘muyla bi-hasebi’l-emâne terekesine vâzı‘u’l-yed olan Ömer Ağa b. Osman mahzarında üzerine da‘vâ ve takrîr-i kelâm edip müteveffâ-yı mezbûr İnâyetullah Efendi hâl-i sıhhatinde benim için li-üm er karındaşım oğlu ve hasren vârisimdir deyü huzûr-ı Müslimînde ikrâr edip ve musırrân vefât etmekle mecmû‘-ı terekesine zâhirde benden gayrı mukarrun-leh bi’n-neseb cihetinden vâris ve âhar müstahak yoğiken emîn-i mezbûr bi-gayr-ı hakkın vaz‘-ı [yed] eylemişdir suâl olunup kasr-ı yedine tenbîh olunmak matlûbumdur dedikde gıbbe’s-suâl emîn-i mezbûr tereke-i müteveffâ-yı mezbûra vech-i mübeyyen üzre vaz‘-ı yedini ikrâr ve müdde‘î-i mezbûrun vech-i muharrer üzre müdde‘âsını inkâr edicek müdde‘î-i mezbûrdan sıdk-ı makāline mutâbık beyyine taleb olundukda udûl-i ahrâr-ı ricâl-i Müslimînden olup mahmiye-i mezbûrede Dâye Hatun Mahallesi’nde sâkin es-Seyyid Hasan Efendi b. es-Seyyid Ahmed Efendi ve Koğacılar Mahallesi’nde sâkin Mehmed Efendi b. Ali li-ecli’ş-şehâde meclis-i ma‘kūd-ı mezbûra hâzırân olup istişhâd olunduklarında fi’l-hakīka müteveffâ-yı mezbûr İnâyetullah Efendi hâl-i sıhhatinde müdde‘î-i mezbûr için benim li-üm karındaşım oğlu ve hasren vârisimdir deyü ikrâr ve bizi işhâd eyleyip musırrân aleyh vefât eyledi biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle oldukdan sonra vâki‘ hâli mevlânâ-yı mezbûr istimâ‘ ve tahrîr ba‘dehû meclis-i şer‘a gelip alâ-vukū‘ihî inhâ-i tahkīk etmeğin mûcebiyle ba‘de’l-hükm mâ-vaka‘a bi’t-taleb ketb olundu. Tahrîren fi’l-yevmi’s-sâbi‘ aşer min-Zilhicceti’ş-şerîfe li-sene tis‘în ve elf. Şuhûdü’l-hâl: el-Hâc Ali b. Abdullah, el-Hâc Ali Efendi Sahhâf, Osman Çelebi b. ( ) Ûdî, Abdullah Çelebi b. Ahmed, Süleyman Çelebi b. ( ), Hüseyin Çelebi b. ( ) Haffâf.