Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 124 Hüküm no: 84 Orijinal metin no: [22b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühani bt. Hasan’ın evini İsmihan Hatun’a sattığı Husûs-ı âti’l-beyânın mahâllinde tahrîri iltimâs olunmağın savb-ı şer‘-i mergūbdan irsâl olunan Hüseyin Efendi b. Himmet mahmiye-i İstanbul’da Tevkī‘î Cafer Çelebi Mahallesi’nde sâkin fahrü’l-müderrisîni’l-kirâm Tireli Ahmed Efendi’nin menziline varıp zeyl-i kitâbda muharrerü’l-esâmî olan Müslimîn huzûrunda akd-i meclis-i şer‘-i mübîn eyledikde mahalle-i mezbûrede sâkine Ümmühani bt. Hasan nâm hatunun zâtını ma‘rifet-i şer‘iye ile ârifân Müezzin Hasan Efendi b. el-Hâc Mustafa ve el-Hâc Yusuf b. Ali ta‘rîfleri ile mu‘arrefe oldukdan sonra mezbûre Ümmühani meclis-i ma‘kūd-ı mezbûrda işbu bâ‘isetü’l-kitâb umdetü’l-muhadderât zübdetü’l-muvakkarât İsmihan Hatun bt. el-merhûm Abdülaziz Efendi tarafından husûs-ı âti’l-beyâna vekîl olduğu nehc-i şer‘î ve tarîk-ı mer‘î üzre sâbit olan fahrü’l-müderrisîn Uşşâkīzâde Osman Efendi mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk [ve] hakkım olup mahalle-i mezbûrede vâki‘ bir tarafı müvekkile-i mûmâ-ileyhânın odaları ve bir tarafdan mezbûr Hüseyin Efendi’nin tasarrufunda olup Medîne vakfı olan menzil ve bir tarafdan yine Medîne-i Münevvere vakfı olup Osman Beşe nâm kimesne tasarrufunda olan arsa-i hâliye ve bir tarafdan Helvâcı Mustafa nâm kimesne sâkin olduğu menzilin bahçesi ile mahdûd olup tahtânî iki bâb harâbe odayı ve bir su kuyusunu ve zât-ı eşcâr-ı müsmire ve gayr-ı müsmire bahçeyi müştemil olan menzilimi cümle tevâbi‘iyle tarafeynden îcâb ve kabûlü [hâvî] şurût-ı müfsideden ârî bey‘-ı kat‘î ile yüz seksen esedî guruşa vekîl-i mezbûr Osman Efendi’ye bey‘ ve teslîm ol dahi müvekkile-i mûmâ-ileyh[â] için iştirâ ve tesellüm edip semeni olan meblağ-ı mezbûr yüz seksen esedî guruşu işbu meclisde vekîl-i mezbûr Osman Efendi yedinden tamamen ahz ü kabz eyledim min-ba‘d menzil-i mahdûd-ı mezbûrda kat‘a alâka ve medhalim kalmayıp müvekkile-i mûmâ-ileyhânın mülk-i müşterâsı olmuşdur keyfe mâ teşâ’ ve tahtâr mutasarrıfa olsun dedikde gıbbe’t-tasdîkı’ş-şer‘î <> husûs-ı mezbûru mevlânâ-yı mezbûr mahâllinde tahrîr ba‘dehû ma‘an irsâl olunan Abdülfettah ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-işrîn min-Zilhicceti’ş-şerîfe li-sene tis‘în ve elf. Şuhûdü’l-hâl: İsmail Ağa Kethudâ, Mehmed Efendi b. Mustafa, el-Hâc Ahmed b. Receb Efendi, Receb Ağa b. Ali, Hasan Efendi b. el-Hâc Mustafa.